Wednesday, October 7, 2020
ശ്രീമദ് ഭഗവദ് ഗീത എട്ടാം അദ്ധ്യായത്തിന്റെ മാഹാത്മ്യം
ഗീതാ മാഹാത്മ്യം
(പദ്മ പുരാണത്തിൽ നിന്ന് ഉദ്ധൃതം)
അവതരണം/ വിവർത്തനം - ശുദ്ധഭക്തി വൃന്ദം
🔆🔆🔆🔆🔆🔆🔆🔆
ശ്രീമദ് ഭഗവദ് ഗീത എട്ടാം അദ്ധ്യായത്തിന്റെ മാഹാത്മ്യം
🔆🔆🔆🔆🔆🔆🔆🔆
മഹാദേവൻ പറഞ്ഞു, "എന്റെ പ്രിയ പാർവ്വതീ, ഭഗവദ് ഗീതയുടെ ദിവ്യശക്തി അപരിമേയമാണ്. ഭഗവദ് ഗീതയുടെ എട്ടാം അദ്ധ്യായത്തിന്റെ മഹത്വം ഞാൻ വർണിക്കുന്നത് ദയവായി ശ്രവിക്കൂ. അത് നിന്റെ ഹൃദയത്തിൽ ആനന്ദം പ്രദാനം ചെയ്യുന്നതായിരിക്കും".
"ഒരിക്കൽ ഭവശർമ്മൻ എന്ന നാമത്തിൽ പതീതനായ ഒരു ബ്രാഹ്മണൻ ജീവിച്ചിരിപ്പുണ്ടായിരുന്നു. അദ്ദേഹം ഭാരതത്തിന്റെ തെക്കു ഭാഗത്ത് അമർധകപൂർ എന്ന പട്ടണത്തിലായിരുന്നു വസിച്ചിരുന്നത്. അദ്ദേഹം വിവാഹിതനായിരുന്നെങ്കിൽ പോലും മോഷണം, വേട്ടയാടൽ, മാംസം ഭക്ഷിക്കൽ, മദ്യപാനം തുടങ്ങിയ പാപ കർമ്മങ്ങളിൽ തന്റെ കൂടുതൽ സമയവും ചിലവഴിച്ചു.
ഭവശർമ്മ കുറേയേറെ വിരുന്നുകളിൽ പങ്കെടുത്തുകൊണ്ടേയിരുന്നു. അങ്ങനെ അതിലൊരു വിരുന്നിൽ പങ്കെടുത്തുകൊണ്ടിരിക്കെ അയാൾ അമിതമായ മദ്യപാനം കാരണം രോഗബാധിതനായി. തൽഫലമായി ആ പാപിയായ വ്യക്തിക്ക് വിട്ടുമാറാത്ത അതിസാരം പിടിപെടുകയും, കുറേ ദിവസത്തെ ദുരിതാനുഭവങ്ങൾക്കു ശേഷം മരണപ്പെടുകയും ചെയ്തു. അയാൾ പിന്നീട് ഒരു ഈന്തപ്പനയായി പുനർജനിച്ചു.
കുറച്ചു കാലങ്ങൾക്കു ശേഷം, രണ്ടു ബ്രഹ്മരക്ഷസ്സുകൾ ആ മരത്തിനു കീഴിൽ വിശ്രമിക്കുവാൻ തീരുമാനിച്ചു, ഞാൻ അവരുടെ ചരിത്രം കൂടി നിനക്കു വിശദീകരിച്ചു നൽകാം, ശ്രദ്ധയോടെ കേൾക്കുക
എല്ലാ വൈദിക ശാസ്ത്രങ്ങളും സ്വായത്തമാക്കിയ ഒരു ബ്രാഹ്മണനായിരുന്നു കുശിബാൽ, എങ്കിലും അയാൾ അത്യാഗ്രഹിയായിരുന്നു, മാത്രമല്ല അയാളുടെ ഭാര്യ കുമതി ദുഷിച്ച മനസ്സിനുടമയുമായിരുന്നു. അവർ ദിവസേന ആവശ്യത്തിലധികം ദാനം സ്വീകരിച്ചിരുന്നു, എന്നാൽ അവയുടെ പങ്ക് മറ്റുള്ളവർക്കു നൽകുവാൻ തയ്യാറായതുമില്ല. അനന്തരഫലമായി അവർ മരണ ശേഷം ബ്രഹ്മരക്ഷസ്സുകളായി മാറി. ആ പ്രേത രൂപത്തിൽ അവർ വിശപ്പിനാലും ദാഹത്താലും ഭൂമിയിൽ അലഞ്ഞു നടന്നു. അങ്ങനെ ഒരു ദിവസം അവർ ഒരു ഈന്തപ്പനയുടെ താഴെ വിശ്രമിക്കുവാൻ തീരുമാനിച്ചു.
ഈ ദുരിത പൂർണമായ ജീവിതത്തിൽ ക്ഷമ നശിച്ച ഭാര്യ, ഭർത്താവിനോട് യാചിച്ചു കൊണ്ടു പറഞ്ഞു. "നമുക്ക് എങ്ങനെയാണ് ഈ നികൃഷ്ടമായ ജീവിതത്തിൽ നിന്നും മോചിതരാകുവാൻ സാധിക്കുക? എനിക്ക് ഇതിൽ കൂടുതൽ സഹിക്കുവാൻ സാധിക്കില്ല!"
പൂർവ കാലത്ത് താൻ പഠിച്ചിരുന്ന ശിക്ഷണങ്ങൾ ഓർത്തെടുത്ത ഭർത്താവ് മറുപടി പറഞ്ഞു. ബ്രഹ്മത്തെയും, ആത്മാവിനെക്കുറിച്ചും, ശരിയായ കർമ്മങ്ങളെ കുറിച്ചുമുള്ള ജ്ഞാനത്തിൽ കൂടി മാത്രമേ നമുക്ക് ഈ പാപഭരിതമായ അവസ്ഥയിൽ നിന്നും മോചനം ലഭിക്കുകയുള്ളൂ.
ഭാര്യ പിന്നീട് ചോദിച്ചു "കിം തദ്ബ്രഹ്മ കിമദ്ധ്യാത്മം കിം കർമ പുരുഷോത്തമ" അതിനർത്ഥം ഓ പ്രഭുവേ, എന്താണ് ബ്രഹ്മം? ആത്മാവെന്നാലെന്ത്? എന്തൊക്കെയാണ് യഥോചിതമായ കർമ്മങ്ങൾ? അറിയാതെയാണെങ്കിൽ പോലും ഭഗവദ് ഗീതയിലെ എട്ടാം അദ്ധ്യായത്തിലെ ഒന്നാമത്തെ ശ്ലോകത്തിന്റെ പകുതി ഭാഗമാണ് ഭാര്യ ഉരുവിട്ടിരുന്നത്. ശേഷം വിസ്മയകരമായ ഒരു കാര്യം സംഭവിച്ചു. അവരെ ആശ്ചര്യം കൊള്ളിച്ചുകൊണ്ട് ആ ഈന്തപ്പന അപ്രത്യക്ഷമാവുകയും ആ സ്ഥാനത്ത് ഒരു ബ്രാഹ്മണനെ കാണുവാൻ സാധിക്കുകയും ചെയ്തു. എന്താണ് സംഭവിച്ചതെന്നു വച്ചാൽ, ആ വാക്കുകളുടെ അസാധാരണ ശക്തിയാൽ ഭവശർമ്മൻ ഈന്തപ്പനയുടെ രൂപത്തിൽ നിന്നും മോചിതനായി വീണ്ടും ബ്രാഹ്മണനായി മാറി, എല്ലാ പാപങ്ങളിൽ നിന്നും മുക്തനായി.
പൊടുന്നനെ ആകാശത്തിൽ മനോഹരമായ ഒരു പുഷ്പക വിമാനം പ്രത്യക്ഷമായി. അത് താഴെയെത്തിയപ്പോൾ പതിയും പത്നിയും തങ്ങളുടെ ബ്രഹ്മ രക്ഷസ്സുകളുടെ ശരീരത്തിൽ നിന്നും മോചിതരായി, അവരെയും വിസ്മയിപ്പിച്ചുകൊണ്ട് ദിവ്യ ശരീരങ്ങൾ പൂകിയ ആ ദമ്പതികൾ തങ്ങളെയും കാത്തിരിക്കുന്ന ദിവ്യവിമാനത്തിൽ വൈകുണ്ഡ ലോകങ്ങളിലേക്ക് യാത്രയായി.
ഇതു കണ്ട് അമ്പരന്ന ഭവശർമ്മൻ എന്ന ആ ബ്രാഹ്മണന് ഹൃദയത്തിൽ പരിവർത്തനം സംഭവിക്കുകയും, അദ്ദേഹം കർത്തവ്യബോധത്തോടെ ആ ദിവ്യമായ വാക്കുകൾ എഴുതുന്നതിൽ ഏർപ്പെടുകയും ചെയ്തു- "കിം തദ്ബ്രഹ്മ കിമദ്ധ്യാത്മം കിം കർമ പുരുഷോത്തമ". അതിനു ശേഷം ഗംഗാ നദീ തീരത്തുള്ള കാശിപുരിയിലേക്ക് യാത്രയായ അദ്ദേഹം, ഭഗവാന്റെ സംതൃപ്തിക്കായി കഠിന തപശ്ചര്യകളോടുകൂടി ഈ പകുതി ശ്ലോകങ്ങൾ തുടരെ പാരായണം ചെയ്യുവാൻ തുടങ്ങി.
ഭവശർമ്മന്റെ അചഞ്ചലമായ ദൃഢനിശ്ചയത്തിൽ സംപ്രീതനായ ഭഗവാൻ വിഷ്ണു, അദ്ദേഹത്തിന് ആത്മീയ ലോകങ്ങളിലേക്ക് പ്രവേശനം നൽകി. മാത്രമല്ല അതേ അനുഗ്രഹം അദ്ദേഹത്തിന്റെ പിതൃക്കൾക്കും നൽകി."
മഹാദേവൻ ഉപസംഹരിച്ചു, "പ്രിയ പാർവ്വതീ, ഇങ്ങനെ ഭഗവദ് ഗീതയുടെ എട്ടാം അദ്ധ്യായത്തിന്റെ മഹാത്മ്യങ്ങളുടെ ഒരു സൂചന മാത്രമാണ് ഞാൻ നിനക്കു വിശദീകരിച്ചു നൽകിയത്.
🔆🔆🔆🔆🔆🔆🔆🔆🔆🔆🔆🔆🔆🔆🔆🔆
ഹരേ കൃഷ്ണ ഹരേ കൃഷ്ണ
കൃഷ്ണ കൃഷ്ണ ഹരേ ഹരേ
ഹരേ രാമ ഹരേ രാമ
രാമ രാമ ഹരേ ഹരേ
🔆🔆🔆🔆🔆🔆🔆🔆🔆🔆🔆🔆🔆🔆🔆🔆
ഹരേ കൃഷ്ണ 🙏
ഇതുപോലെയുള്ള ആത്മീയ വിഷയങ്ങൾ വായിക്കുവാനായി ഗൂഗിൾ പ്ലേസ്റ്റോറിൽ നിന്ന് ടെലഗ്രാം ആപ്ലിക്കേഷൻ ഇൻസ്റ്റാൾ ചെയ്യുക അതിനു ശേഷം താഴെക്കാണുന്ന ലിങ്ക് പിൻതുടരുക .
ടെലഗ്രാം
🔆🔆🔆🔆🔆🔆🔆🔆
വാട്സ്ആപ്പ്
🔆🔆🔆🔆🔆🔆🔆🔆
https://chat.whatsapp.com/GJ8jXFWd7PMHAnWkwb3CjF
വെബ്സൈറ്റ്
🔆🔆🔆🔆🔆🔆🔆🔆
ശ്രീമദ് ഭഗവദ് ഗീത ഏഴാം അദ്ധ്യായത്തിന്റെ മാഹാത്മ്യം
ഗീതാ മാഹാത്മ്യം
(പദ്മ പുരാണത്തിൽ നിന്നും ഉദ്ധൃതം)
അവതരണം/ വിവർത്തനം - ശുദ്ധഭക്തി വൃന്ദം
🔆🔆🔆🔆🔆🔆🔆
ശ്രീമദ് ഭഗവദ് ഗീത ഏഴാം അദ്ധ്യായത്തിന്റെ മാഹാത്മ്യം
🔆🔆🔆🔆🔆🔆🔆
മഹാദേവൻ പറഞ്ഞു, "എന്റെ പ്രിയ പാർവ്വതീ, ഭഗവദ് ഗീതയുടെ ഏഴാം അദ്ധ്യായത്തിന്റെ ദിവ്യ മഹാത്മ്യങ്ങൾ കേട്ടു കൊള്ളുക."
പാടലീപുത്രം എന്ന വലിയ നഗരത്തിൽ ശംഖുകർണ്ണൻ എന്ന ഒരു ബ്രാഹ്മണൻ ജീവിച്ചിരുന്നു. അയാൾ ഒരു നാസ്തികനെ പോലെ, ശ്രീ കൃഷ്ണ ഭഗവാന്റെ ഭക്തിയുത സേവനത്തിൽ ഏർപ്പെട്ടിരുന്നില്ല. തന്റെ മൺമറഞ്ഞ പിതൃക്കളെ അവരുടെ പാപ പ്രതികരണങ്ങളിൽ നിന്നും മോചിപ്പിക്കുവാനുതകുന്ന യാതൊരു വിധ ധർമ്മാചരണങ്ങളും നിർവഹിക്കുവാൻ അയാൾ തയ്യാറായില്ല.
വാണിജ്യത്തിലൂടെ ഭീമമായ ധനം സമ്പാദിച്ചു കൂട്ടുക എന്നതിൽ മാത്രമായിരുന്നു ശംഖുകർണ്ണന്റെ മുഖ്യമായ ശ്രദ്ധ. ഈ പ്രയത്നത്തിൽ അദ്ദേഹം അത്ഭുതകരമാം വിധം വിജയം കൈവരിക്കുകയും ചെയ്തു. ഇതു കാരണം മഹാന്മാരായ രാജാക്കന്മാർ പോലും അദ്ദേഹത്തിന്റെ ആഡംബര ഗൃഹത്തിൽ അതിഥികളായി വന്ന് വിരുന്ന് ഉണ്ണുമായിരുന്നു. ഇത്രയും വലിയ സമ്പത്തുണ്ടായിട്ടും അത്യാഗ്രഹം കാരണം, ശംഖുകർണ്ണൻ പിശുക്കന്മാരിൽ തന്നെ ഏറ്റവും നികൃഷ്ടനായ വ്യക്തിയായി മാറി, അദ്ദേഹം തന്റെ സമ്പാദ്യമെല്ലാം അനാവശ്യമായി ഭൂമിക്കടിയിൽ പൂഴ്ത്തിവച്ചു, ആ സ്ഥലത്തെ കുറിച്ച് അദ്ദേഹത്തിനു മാത്രമേ അറിയുമായിരുന്നുള്ളൂ.
സ്വന്തം കുടുംബത്തിൽ പോലും അയാൾ തൃപ്തനായിരുന്നില്ല. മൂന്നു ഭാര്യമാരും അവരിൽ പുത്രന്മാരും ഉണ്ടായിരുന്നെങ്കിൽ പോലും അയാൾ വീണ്ടും വിവാഹം കഴിക്കുവാൻ തീരുമാനിച്ചു. അങ്ങനെ നാലാമതൊരു കല്യാണം കഴിക്കുവാനായി അയാൾ തന്റെ ബന്ധുക്കളുടെ കൂടെ മറ്റൊരു പട്ടണത്തിലേക്ക് പോയി. അങ്ങനെ അവർ വഴിയിൽ വിശ്രമിക്കുവാൻ തീരുമാനിച്ചു. എന്നാൽ നിദ്രാ വേളയിൽ അയാൾക്ക് ഒരു വിഷസർപ്പത്തിന്റെ മാരക ദംഷ്ട്രനം ഏൽക്കേണ്ടി വന്നു. അദ്ദേഹത്തിന്റെ മക്കളും, ബന്ധുക്കളും മരുന്നു കൊണ്ടും മന്ത്രം കൊണ്ടും രക്ഷിക്കുവാൻ ശ്രമിച്ചെങ്കിലും എല്ലാം വിഫലമായിപ്പോയി.
അടുത്ത ജന്മത്തിൽ ശംഖുകർണ്ണൻ ഒരു പ്രേത സർപ്പമായി മാറി. അദ്ദേഹത്തിന് തന്റെ പൂർവ്വജന്മ സ്‌മൃതി ലഭിച്ചതിനാൽ, അയാൾ നേരെ തന്റെ സമ്പാദ്യം പൂഴ്ത്തി വച്ച സ്ഥലത്തേക്ക് യാത്രയായി. സ്വാഭാവികമായും അയാളുടെ പൂർവ്വ ജന്മത്തിലെ കുടുംബം വസിച്ചിരുന്നതിന്റെ സമീപത്തു തന്നെയായിരുന്നു ഈ സ്ഥലം . കുറച്ചു കാലത്തോളം അദ്ദേഹം തന്റെ സമ്പാദ്യം സംരക്ഷിക്കുന്നതിൽ സംതൃപ്തി കണ്ടെത്തി. എന്നാൽ പെട്ടെന്നു തന്നെ തന്റെ പ്രേതസർപ്പത്തിന്റെ രൂപത്തിലുള്ള ഈ ജീവിതത്തിൽ അദ്ദേഹം നിരാശനായി മാറി. അങ്ങനെ അയാൾ തന്റെ മക്കളുടെ സ്വപ്നത്തിൽ പ്രത്യക്ഷപ്പെടുകയും അവരോട് സഹായത്തിനായി അപേക്ഷിക്കുകയും ചെയ്തു. അദ്ദേഹം അവരോട് പറഞ്ഞു, "ഞാൻ നിങ്ങളുടെ ദിവംഗതനായ പിതാവാണ്, ഇപ്പോൾ പ്രേത സർപ്പത്തിന്റെ ജീവിതം നയിച്ചുകൊണ്ട് ബൃഹത്തായ ഒരു നിധി ശേഖരം കാത്തുകൊണ്ടിരിക്കുകയാണ്. നിങ്ങൾക്ക് അത് പങ്കു വച്ചു തരുവാൻ ഞാനാഗ്രഹിക്കുന്നു." അതിനു ശേഷം നിധി എവിടെയാണെന്ന് അയാൾ അവർക്ക് പറഞ്ഞു കൊടുത്തു
അടുത്ത ദിവസം രാവിലെ എല്ലാ പുത്രന്മാരും തങ്ങൾക്കുണ്ടായ സ്വപ്നത്തെക്കുറിച്ച് പരസ്പരം സംസാരിച്ചു. അവരിൽ ഒരു പുത്രൻ, ശിവൻ തങ്ങൾക്കുണ്ടായ സ്വപ്നം യാദൃശ്ചികമായി സംഭവിച്ചതല്ല എന്ന് സംശയിച്ചു, ശിവൻ അച്ഛനെ പോലെ തന്നെ ധനത്തോട് അത്യാഗ്രഹമുള്ള വ്യക്തിയായിരുന്നു. അയാൾ തിടുക്കത്തോടെ ഒരു മൺവെട്ടിയെടുത്തുകൊണ്ട് സ്വപ്നത്തിൽ വിവരിച്ച സ്ഥലത്തേക്ക് പോയി, പാമ്പിൻ മാളം ഉണ്ടായിട്ടും അവിടെ കുഴിക്കുവാൻ തുടങ്ങി. അതേ സമയം അവിടെ ഉറങ്ങി കിടക്കുകയായിരുന്ന പ്രേത സർപ്പം ഭയ ചകിതനായി ഞെട്ടിയുണർന്നു.
ആ പ്രേത സർപ്പം പുറത്തു വന്ന ശേഷം ഭയപ്പെടുത്തുന്ന വിധത്തിൽ ഉച്ചത്തിൽ ചീറ്റിക്കൊണ്ട് തന്റെ പത്തി ആട്ടുവാൻ തുടങ്ങി. "ഹേ പമ്പര വിഡ്ഡീ? നിനക്ക് എങ്ങനെ ധൈര്യം വന്നു എന്നെ ശല്യപ്പെടുത്തുവാൻ? നീ ആരാണ്? എന്താണ് നിന്റെ ഉദ്ദേശ്യം? ആരാണ് നിന്നെ പറഞ്ഞയച്ചത്? ഉത്തരം പറയൂ". ആ സന്ദർഭം മനസ്സിലാക്കിയ ശിവൻ ഉടനെ മറുപടി പറഞ്ഞു. "ഞാൻ അങ്ങയുടെ പുത്രനാണ്, ശിവൻ, കഴിഞ്ഞ രാത്രി അങ്ങ് എന്റെ സ്വപ്നത്തിൽ വന്നുകൊണ്ട് ഈ നിധി ശേഖരിക്കുവാൻ പറഞ്ഞിരുന്നു."
ഈ മറുപടിയിൽ സംപ്രീതനായ പ്രേത സർപ്പം ചിരിച്ചു കൊണ്ട് മറുപടി പറഞ്ഞു. "അതെ, പക്ഷെ നീ ഒരു കാര്യം മറന്നിരിക്കുന്നു. നീ എന്റെ മകൻ തന്നെയാണെങ്കിൽ എന്തുകൊണ്ട് ഈ സർപ്പ രൂപത്തിൽ നിന്നും എനിക്ക് മോചനം ലഭിക്കുവാനാവശ്യമായ അനുഷ്‌ഠാനങ്ങൾ നിർവഹിക്കാതിരിക്കുന്നു ? അത്യാഗ്രഹത്താൽ മാത്രമാണ് എനിക്ക് ഇങ്ങനെയൊരു ശാപമേൽക്കേണ്ടി വന്നത്. എന്റെ വിധി തന്നെ നിനക്കും വന്നു ചേരണം എന്നാണോ നീ ആഗ്രഹിക്കുന്നത്?"
ഈ ചോദ്യത്തിനു മറുപടിയായി അജ്ഞനായ ആ മകൻ വിനയത്തോടെ തന്റെ പിതാവിനോട് ആരാഞ്ഞു, "ഞാൻ എന്താണ് ചെയ്യേണ്ടത്?"
പ്രേത സർപ്പം മറുപടി പറഞ്ഞു, "എന്റെ പ്രിയ പുത്രാ, യാതൊരു വിധത്തിലുള്ള ദാനമോ, തപസ്സോ, യജ്ഞമോ എനിക്ക് പൂർണ്ണ സന്തോഷമോ സ്വാതന്ത്ര്യമോ നൽകുന്നില്ല. ഭഗവദ് ഗീതയുടെ ഏഴാം അദ്ധ്യായം പാരായണം ചെയ്യുന്നതിലൂടെ മാത്രമേ ഞാൻ ജനന മരണ ചക്രങ്ങളിൽ നിന്നും മോചിതനാവുകയുള്ളൂ. അതിനാൽ ഈ അദ്ധ്യായം അറിയാവുന്ന ഒരു പരിശുദ്ധനായ ബ്രാഹ്മണനെ കണ്ടെത്തുക, മാത്രമല്ല ശ്രാദ്ധ കർമ്മങ്ങൾ നടത്തുമ്പോൾ അദ്ദേഹത്തെ നല്ല രീതിയിൽ ഊട്ടുക. ശ്രാദ്ധ കർമ്മങ്ങൾ എന്റെ പാപങ്ങൾ ഇല്ലാതാക്കും, പക്ഷെ ഭഗവദ് ഗീതയുടെ ഏഴാം അദ്ധ്യായം എനിക്ക് വൈകുണ്ഡത്തിലേക്കുള്ള പ്രവേശന കവാടം തുറന്നു തരുന്നു. അതിനാൽ ദയവായി എനിക്കായി നീ ഇതു ചെയ്യുക".
അച്ഛനെ പ്രീതിപ്പെടുത്തുവാനുള്ള ആഗ്രഹത്താൽ ശിവനും സഹോദരങ്ങളും ശ്രാദ്ധ കർമ്മങ്ങൾ നിർവഹിക്കുകയും, അതേ സമയം തന്നെ ഒരു യോഗ്യനായ ബ്രാഹ്മണൻ ഭഗവദ് ഗീതയുടെ ഏഴാം അദ്ധ്യായം പാരായണം ചെയ്യുകയും ചെയ്തു. ആ ശ്ലോകങ്ങളുടെ ശക്തിയാൽ ശംഖുകർണ്ണൻ പ്രേത സർപ്പത്തിന്റെ ശരീരത്തിൽ നിന്നും മോചിതനായി ചതുർഭുജനായ ആദ്ധ്യാത്മിക ശരീരം നേടി(സാരൂപ്യ മുക്തി). ശേഷം തന്റെ പുത്രന്മാരെ അനുഗ്രഹിച്ചു കൊണ്ട് ആദ്ധ്യാത്മിക ലോകത്തിലേക്ക് യാത്രയായി.
അനുഗ്രഹീതരായ പുത്രന്മാർക്ക് ഭഗവാൻ ശ്രീ കൃഷ്ണനിൽ ഭക്തി ജനിക്കുകയും, അവരുടെ ധനത്താൽ ക്ഷേത്രങ്ങൾ നിർമ്മിക്കുകയും, പ്രസാദ വിതരണം നടത്തുകയും, കിണറുകൾ നിർമിച്ചു നൽകുകയും ചെയ്തു. അവർ ദിവസേന ഭഗവദ് ഗീതയിലെ ഏഴാം അദ്ധ്യായം പാരായണം ചെയ്തു. അവസാനം അവരും തങ്ങളുടെ പിതാവിനെ പോലെ തന്നെ വൈകുണ്ഡം പൂകി.
മഹാദേവൻ ഉപസംഹരിച്ചു. "എന്റെ പ്രിയ പാർവ്വതീ, ആരാണോ ഈ വർണ്ണനം കേൾക്കുന്നത് അവർ എല്ലാ പാപ കർമ്മങ്ങളിൽ നിന്നും മോചിതരാകുന്നു".
🔆🔆🔆🔆🔆🔆🔆🔆🔆🔆🔆🔆🔆🔆🔆🔆
ഹരേ കൃഷ്ണ ഹരേ കൃഷ്ണ
കൃഷ്ണ കൃഷ്ണ ഹരേ ഹരേ
ഹരേ രാമ ഹരേ രാമ
രാമ രാമ ഹരേ ഹരേ
🔆🔆🔆🔆🔆🔆🔆🔆🔆🔆🔆🔆🔆🔆🔆🔆
ഹരേ കൃഷ്ണ 🙏
ഇതുപോലെയുള്ള ആത്മീയ വിഷയങ്ങൾ വായിക്കുവാനായി ഗൂഗിൾ പ്ലേസ്റ്റോറിൽ നിന്ന് ടെലഗ്രാം ആപ്ലിക്കേഷൻ ഇൻസ്റ്റാൾ ചെയ്യുക അതിനു ശേഷം താഴെക്കാണുന്ന ലിങ്ക് പിൻതുടരുക .
ടെലഗ്രാം
🔆🔆🔆🔆🔆🔆🔆🔆
വാട്സ്ആപ്പ്
🔆🔆🔆🔆🔆🔆🔆🔆
https://chat.whatsapp.com/GJ8jXFWd7PMHAnWkwb3CjF
വെബ്സൈറ്റ്
🔆🔆🔆🔆🔆🔆🔆🔆
Subscribe to:
Posts (Atom)