രാസക്രീഡ

 രാസക്രീഡ

🍁🍁🍁🍁🍁🍁

പരമദിവ്യോത്തമപുരുഷനായ കൃഷ്ണന് ദിവ്യവും അതീന്ദ്രിയവുമായ മാനസികാവസ്ഥകളെക്കുറിച്ച് നന്നായി അറിയാം. ഭഗവാനുമായി തീവ്ര മമതയിൽ മുറുക്കെ ബന്ധിതരും പൂർണസമർപ്പണം ചെയ്തവരുമായ ഗോപികമാരുടെ സാന്നിധ്യത്തിൽ ഭഗവാൻ അസംഖ്യം രൂപങ്ങളായി വികസിച്ചു. രാസനൃത്തം ചെയ്യാനുള്ള ഉത്സാഹത്താൽ ഗോപികമാർ ഉന്മത്തരായി. പാടിയും ആടിയും വിലാസലോലരായി പെരുമാറിയും അവർ കൃഷ്ണന്റെ ഇന്ദ്രിയങ്ങൾക്ക് ആനന്ദം പകർന്നു. ഗോപികമാരുടെ സുമധുരനാദം ദിക്കെല്ലാം നിറഞ്ഞു.

കൃഷ്ണൻ അനേകം രൂപത്തിൽ പ്രത്യക്ഷപ്പെട്ടിട്ടും ഓരോ ഗോപിയും കരുതിയത് കൃഷ്ണൻ തന്റെ മാത്രം അരികിൽ നിൽക്കുന്നുവെന്നാണ്. തുടരെ ആടിയും പാടിയും ഗോപികമാർ തളർന്നു തുടങ്ങി. അരികിൽ നിൽക്കുന്ന കൃഷ്ണന്റെ തോളിൽ ഓരോ ഗോപിയും സ്വന്തം കരമണച്ചു. താമരപ്പൂവിന്റെ സുഗന്ധം പേറുന്ന ചന്ദനലേപനമണിഞ്ഞ കൃഷ്ണന്റെ കരം ഗോപികമാർ മുകരുകയും ചുംബിക്കുകയും ചെയ്തു. ചിലർ കൃഷ്ണന്റെ കരം സ്വന്തം ശരീരങ്ങളിൽ ചേർത്തു. ഇനിയും ചിലർ സ്നേഹപൂർവ്വം ആലിംഗനം ചെയ്ത് കൃഷ്ണന് ആനന്ദമേകി.

പരമവും ഏകവുമായ നിരപേക്ഷ സത്യം എന്ന നിലയ്ക്ക് കൃഷ്ണനാണ് ഏക ഭോക്താവും ഭോജ്യവും. അദ്വിതീയനായ അദ്ദേഹം ലീലാവിലാസത്തിനായി പലതായി വികസിച്ചു. സ്വന്തം പ്രതിബിംബത്തിനോടു കളിയാടുന്ന ശിശുവിനെപ്പോലെയാണ് കൃഷ്ണന്റെ രാസക്രീഡയെന്ന് മഹാപണ്ഡിതന്മാർ പറയുന്നു. ശ്രീ കൃഷ്ണൻ ആത്മരാമനാണ്. സ്വയം തൃപ്തനാണ്. അമേയമായ ദിവ്യൈശ്വര്യങ്ങളും അദ്ദേഹത്തിനുണ്ട്. കൃഷ്ണൻ രാസക്രീഡപോലുള്ള ലീലകളാവിഷ്കരിക്കുമ്പോൾ ബ്രഹ്മാവു മുതൽ വെറും പുൽക്കൊടിവരെയുള്ള ജീവജാലങ്ങൾ അദ്ഭുതപാരാവാരത്തിൽ മുങ്ങിപ്പൊങ്ങും.

ആരെയും കൂസാത്ത കാമാസക്തരും വിഷയലമ്പടന്മാരുമായ വ്യക്തികളുടെ ചെയ്തികൾപോലെ പുറമേ കാണപ്പെടുന്ന, ഭഗവാന്റെ ഗോപികമാരുമൊത്തുള്ള പ്രണയകേളികളുടെ വിവരണം കേട്ടപ്പോൾ മഹാരാജാ പരീക്ഷിത്ത് പരമഭക്തനായ ശുകമഹർഷിയോട് സംശയമുന്നയിച്ചിരുന്നു. “ശ്രീകൃഷ്ണനാണ് പരമഭോക്താവ് എന്നതിനാൽ ഈ ലീലകളിൽ യാതൊരു ന്യൂനതയും ഏശുകയില്ല. പക്ഷേ പരമപുരുഷനല്ലാതെ മറ്റാരെങ്കിലും അത്തരം ലീലകൾ ആസ്വദിക്കാൻ ശ്രമിച്ചാൽ, രുദ്രനല്ലാതെ മറ്റാരെങ്കിലും വിഷം കുടിക്കാൻ ശ്രമിച്ചാൽ ഉണ്ടാകുന്ന അതേ വിധി തന്നെ നേരിടേണ്ടി വരും. കൃഷ്ണഭഗവാന്റെ രാസലീല അനുകരിക്കുന്നതിനെക്കുറിച്ച് ചിന്തി ക്കുന്നവനു പോലും അതേ ദുർഭാഗ്യം സഹിക്കേണ്ടിവരും.” എന്ന് പ്രസ്താവിച്ച് ശുകമഹർഷി ആ സംശയത്തെ നിവാരണം ചെയ്തു.

പരമനിരപേക്ഷസത്യമായ ഭഗവാൻ ശ്രീ കൃഷ്ണൻ എല്ലാ ജീവജാലങ്ങളുടെയും ഉള്ളിൽ സാക്ഷിയായി കുടികൊള്ളുന്നു. കരുണ മൂലം സ്വന്തം രഹസ്യലീലകൾ ഭക്തർക്കദ്ദേഹം കാണിച്ചുകൊടുക്കുമ്പോൾ അവയെ ലൗകികമായ അപൂർണതകൾകൊണ്ട് മലിനമാക്കരുത്. ഗോപിമാർക്കു കൃഷ്ണനോടു തോന്നിയ നൈസർഗികമായ പ്രേമാകർഷണത്തെക്കുറിച്ച് കേൾക്കുന്ന ഏതൊരു ജീവാത്മാവിന്റെയും ഇന്ദ്രിയസുഖാസക്തികൾ ഉന്മൂലനം ചെയ്യപ്പെടും, പരമപുരുഷനെയും ഗുരുവിനെയും ഭഗവദ് ഭക്തന്മാരെയും സേവിക്കാനുള്ള സ്വാഭാവിക പ്രവണത വളർന്നുവരികയും ചെയ്യും.

(ശ്രീമദ് ഭാഗവതം, ദശമസ്കന്ദം ,അദ്ധ്യായം 33 ന്റെ സംഗ്രഹം)

🔆🔆🔆🔆🔆🔆🔆🔆🔆🔆🔆🔆🔆🔆🔆🔆

ഹരേ കൃഷ്ണ ഹരേ കൃഷ്ണ കൃഷ്ണ കൃഷ്ണ ഹരേ ഹരേ

ഹരേ രാമ ഹരേ രാമ രാമ രാമ ഹരേ ഹരേ

🔆🔆🔆🔆🔆🔆🔆🔆🔆🔆🔆🔆🔆🔆🔆🔆

ഹരേ കൃഷ്ണ 🙏

ഇതുപോലെയുള്ള ആത്മീയ വിഷയങ്ങൾ വായിക്കുവാനായി താഴെക്കാണുന്ന ലിങ്ക് പിൻതുടരുക .

ശുദ്ധ ഭക്തി വാട്സ്ആപ്പ് ഗ്രൂപ്പ് 

  ശുദ്ധ ഭക്തി ടെലഗ്രാം ഗ്രൂപ്പ്  

 www.suddhabhaktimalayalam.com

കാർത്ത്യായനി വ്രതം

 കാർത്ത്യായനി വ്രതം

🍁🍁🍁🍁🍁🍁🍁

വൈദിക സംസ്കാരമനുസരിച്ച്, പത്തിനും പതിനാലിനുമിടയ്ക്ക് പ്രായമുള്ള കന്യകമാർ നല്ല ഭർത്താക്കന്മാരെ കിട്ടാനായി ശിവനേയോ ദുർഗ്ഗാദേവിയേയോ ആരാധിക്കണമെന്നാണു ചട്ടം. എന്നാൽ വൃന്ദാവനത്തിലെ കന്യകമാരൊക്കെ കൃഷ്ണനോടു പ്രേമത്തിലായിരുന്നു. എങ്കിലും ഹേമന്ത കാലത്തെ ആദ്യത്തെ മാസത്തിൽ അവർ ദുർഗ്ഗാരാധന തുടങ്ങി. അഗ്രഹായണം (ഒക്ടോബർ - നവംബർ) എന്നാണ് ഹേമന്തത്തിലെ ആദ്യ മാസത്തിന്റെ പേര്. അന്ന് വൃന്ദാവനത്തിലെ കന്യകമാർ മുഴുവൻ ഒരു  വ്രതമെന്ന നിലയിൽ ത്തന്നെ ദുർഗ്ഗാപൂജ ആരംഭിച്ചു. സുഗന്ധ വ്യഞ്ജനങ്ങളോ പുളിയോ ചേർക്കാതെ അരിയും പരിപ്പും മാത്രമിട്ടു വേവിച്ച ഹവിഷ്യാന്നമാണ് അവരുടെ ഭക്ഷണം. ഏതെങ്കിലും അനുഷ്ഠാന കർമ്മം തുടങ്ങുന്നതിനു മുമ്പ് ശരീരം ശുദ്ധീകരിക്കാൻ ഇത്തരം ഭക്ഷണമാണ് വേദങ്ങളിൽ വിധിച്ചിരിക്കുന്നത്. പ്രഭാതത്തിൽ യമുനാസ്നാനം കഴിച്ച് വൃന്ദാവനത്തിലെ കന്യകമാർ എന്നും കാർത്യായനീ ദേവിയെ പൂജിക്കാറുണ്ട്. ദുർഗ്ഗാദേവിയുടെ മറെറാരു പേരാണ് കാർത്യായനി. യമുനാതീരത്ത് മണലു കൊണ്ടു നിർമ്മിച്ച് വിഗ്രഹം പ്രതിഷ്ഠിച്ചാണവർ ദേവിയെ പൂജിച്ചിരുന്നത്. ലോഹം, രത്നം, മരം, മണ്ണ്, കല്ല് എന്നിവ കൊണ്ടൊക്കെ വിഗ്രഹം നിർമ്മിക്കാമെന്ന് വേദ്രഗ്രന്ഥങ്ങളിൽ പറയുന്നുണ്ട്. ചിത്രം വച്ചും ആരാധിക്കാം. ഇതൊന്നുമല്ലെങ്കിൽ ആരാധനാമൂർത്തിയെ ഹൃദയത്തിൽ സങ്കല്പ്പിച്ചും പൂജ നടത്താം , ഇത്തരം പ്രതിഷ്ഠാ രൂപങ്ങൾ സാങ്കല്പിക മാണെന്ന് അദ്വൈതവാദികൾ കരുതുന്നു. എന്നാൽ അവയൊക്കെ എല്ലാ തരത്തിലും പരംപൊരുളായ ഭഗവാന്റെയോ ദേവന്മാരുടെയോ തനി രൂപങ്ങളായി വേദഗ്രന്ഥങ്ങൾ അംഗീകരിക്കുന്നുണ്ട്. വിഗ്രഹം നിർമ്മിച്ച് അതിൽ ചന്ദനവും പുഷ്പമാല്യങ്ങളും ചാർത്തി ധൂപദീപാദികളാൽ അലങ്കരിച്ച് ധാന്യങ്ങൾ, പഴങ്ങൾ, ഇലകൾ തുടങ്ങിയവ കാഴ്ചവച്ചാണ് അവർ ആരാധന നടത്താറ്. പൂജ കഴിയുമ്പോൾ അനുഗ്രഹങ്ങൾക്കായി പ്രാർത്ഥിക്കും. വൃന്ദാവനത്തിലെ കന്യകമാർ ഭക്തിപൂർവ്വം പ്രാർത്ഥിച്ചിരുന്നത് ഇപ്രകാരമാണ്: “ഹേ കാർത്യായനി, പരാശക്തി, മഹാമായേ, യോഗേശ്വരി, സമസ്ത ലോകേശ്വരി, ദേവീ, എന്നിൽ കാരുണ്യമുണ്ടായി നന്ദകുമാരനായ കൃഷ്ണൻ എനിക്ക് ഭർത്താവായിവരാൻ അനുഗ്രഹിക്കണമേ.' വൈഷ്ണവർ സാധാരണമായി ദേവന്മാരെ ആരാധിക്കാറില്ല. നിർമ്മലമായ ഭക്തിയുതസേവന പുരോഗതി നേടാനാഗ്രഹിക്കുന്നവരാരും ദേവന്മാരെ പൂജിക്കരുതെന്ന് ശ്രീല നരോത്തമ ദാസ് ഠാക്കൂർ പറഞ്ഞിട്ടുണ്ട്.

കൃഷ്ണപ്രേമത്തിൽ ആരെക്കാളും മുമ്പിൽ നിൽക്കുന്ന ഗോപികമാർ ദുർഗ്ഗയെ പ്രാർത്ഥിക്കുന്നതായി പറയുന്നു. ദേവന്മാരെ ആരാധിക്കുന്നവർ ഇക്കാര്യം ചൂണ്ടിക്കാണിക്കാറുണ്ട്. എന്നാൽ ഗോപികമാരുടെ ലക്ഷ്യമെന്താണെന്ന് നാം മനസ്സിലാക്കണം. സാധാരണമായി എന്തെങ്കിലും ഭൗതികലാഭത്തിനു വേണ്ടിയാണ് ദുർഗ്ഗയെ പൂജിക്കുന്നത്. ഇവിടെ ഗോപികമാർ ദുർഗ്ഗയെ ആരാധിച്ചത് കൃഷ്ണനെ ഭർത്താവായി കിട്ടാനാണ്. കർമ്മങ്ങളുടെ കേന്ദ്രം കൃഷ്ണനാണെങ്കിൽ ആ ലക്ഷ്യപ്രാപ്തിക്കു വേണ്ടി ഏതു മാർഗ്ഗവും സ്വീകരിക്കാമെന്നു സാരം. കൃഷ്ണനെ സേവിക്കാനും തൃപ്തിപ്പെടുത്താനും ഗോപികമാർക്ക് ഏതു മാർഗ്ഗവും സ്വീകരിക്കാം. അതാണ് ഗോപികമാരുടെ സർവ്വശ്രേഷ്ഠമായ ലക്ഷണം. കൃഷ്ണനെ ഭർത്താവായിക്കിട്ടാനാണ് ഒരു മാസം മുഴുവൻ അവർ ദുർഗ്ഗയെ പൂജിച്ചത്. നന്ദകുമാരനായ കൃഷ്ണൻ ഭർത്താവായി വരണമെന്നാണ് എന്നും അവർ പ്രാർത്ഥിച്ചിരുന്നത്.

അദ്ധ്യായം 22 / ശ്രീകൃഷ്ണ - പരമദിവ്യോത്തമ പുരുഷൻ

🔆🔆🔆🔆🔆🔆🔆🔆🔆🔆🔆🔆🔆🔆🔆🔆

ഹരേ കൃഷ്ണ ഹരേ കൃഷ്ണ

കൃഷ്ണ കൃഷ്ണ ഹരേ ഹരേ

ഹരേ രാമ ഹരേ രാമ

രാമ രാമ ഹരേ ഹരേ

🔆🔆🔆🔆🔆🔆🔆🔆🔆🔆🔆🔆🔆🔆🔆🔆

ഹരേ കൃഷ്ണ 🙏

ഇതുപോലെയുള്ള ആത്മീയ വിഷയങ്ങൾ വായിക്കുവാനായി ഗൂഗിൾ പ്ലേസ്റ്റോറിൽ നിന്ന് ടെലഗ്രാം ആപ്ലിക്കേഷൻ ഇൻസ്റ്റാൾ ചെയ്യുക അതിനു ശേഷം താഴെക്കാണുന്ന ലിങ്ക് പിൻതുടരുക .

ടെലഗ്രാം

🔆🔆🔆🔆🔆🔆🔆🔆

https://t.me/suddhabhaktimalayalam

വെബ്സൈറ്റ്

🔆🔆🔆🔆🔆🔆🔆🔆

https://suddhabhaktimalayalam.com