ശ്രീല സനാതൻ ഗോസ്വാമി
അവതരണം/ വിവർത്തനം - ശുദ്ധഭക്തി വൃന്ദം
മുൻകാലജീവിതം
കിഴക്കൻ ബംഗാളിലെ ഒരു ബ്രാഹ്മണ കുടുംബത്തിലാണ് ശ്രീല സനാതനഗോസ്വാമി ജനിച്ചത്. അദ്ദേഹത്തിന് നാല് സഹോദരന്മാരും ഒരു സഹോദരിയുമുണ്ടായിരുന്നു. അദ്ദേഹവും അദ്ദേഹത്തിന്റെ രണ്ട് സഹോദരന്മാരായ, ശ്രീല രൂപ ഗോസ്വാമിയും, അനുപം എന്നിവരും കൃഷ്ണന്റെ ശുദ്ധ ഭക്തരായിരുന്നു.
ശ്രീല രൂപഗോസ്വാമിയും ശ്രീല സനാതനഗോസ്വാമിയും വേദഗ്രന്ഥ പഠനത്തിൽ മികവ് പുലർത്തി, ഭക്തിഗുണങ്ങളാൽ ജനങ്ങൾ അവരെ സ്നേഹിച്ചു. രൂപ ഗോസ്വാമി വേദചരിത്രത്തെക്കുറിച്ച് പുസ്തകങ്ങൾ എഴുതി, ശ്രീമദ് ഭാഗവതം ചൊല്ലുന്നതിനിടെ സനാതഗോസ്വാമി പതിവായി കണ്ണുനീർ വാർക്കുമായിരുന്നു. ഈ പഠന രാജാക്കന്മാർ ആയ രണ്ടു സഹോദരന്മാരും രാജ-ഷിഷ്ട എന്നറിയപ്പെട്ടു,. ജനങ്ങൾക്ക് ഇവരോടുള്ള ഇഷ്ടം മുസ്ലിം ഭരണാധികാരി നവാബ് ഹുസൈൻ ഷായുടെ ശ്രദ്ധ ആകർഷിച്ചു.
സർക്കാർ സേവനം
ശ്രീല രൂപഗോസ്വാമിയും ശ്രീല സനാതനഗോസ്വാമിയും തന്റെ സേവനത്തിലേക്ക് നിര്ബന്ധിക്കാൻ നവാബ് തീരുമാനിച്ചു. തന്റെ പക്ഷത്ത് അവർ ഉണ്ടെങ്കിൽ ആളുകളെ നിയന്ത്രിക്കുന്നത് എളുപ്പമാണെന്ന് അദ്ദേഹം കരുതി. അദ്ദേഹം സഹോദരങ്ങളോട് ആജ്ഞാപിച്ചു, "ഈ സംസ്ഥാനം ഭരിക്കാൻ സഹായിക്കാൻ എന്റെ വലംകൈകളായി നിങ്ങൾ വേണമെന്ന് ഞാൻ ആഗ്രഹിക്കുന്നു. നിങ്ങൾ സമ്മതിക്കുന്നില്ലെങ്കിൽ, ഞാൻ നിങ്ങളുടെ കുടുംബത്തെ മുഴുവൻ നാട്ടിൽ നിന്ന് പുറത്താക്കുകയും ഭക്തരെ കഠിനമായി ശിക്ഷിക്കുകയും ചെയ്യും." അവരുടെ കുടുംബത്തെയും സുഹൃത്തുക്കളെയും സംരക്ഷിക്കുന്നതിന്, മറ്റു മാർഗ്ഗമില്ലാത്തതിനാൽ ഈ ആവശ്യങ്ങൾക്ക് അവർ വഴങ്ങി.
അവരുടെ സമർപ്പണത്തിൽ സന്തോഷിച്ച നവാബ് അവർക്ക് വലിയ ധനം നൽകി. ശ്രീല രൂപഗോസ്വാമിയ്ക്ക് സ്വകാര്യ കാര്യദര്ശി “ഡാബിർ ഖാസ്” എന്ന പദവി നൽകി. ശ്രീല സനാതനഗോസ്വാമി നികുതി മന്ത്രി “സകര മാലിക് “എന്നാണ് വിളിച്ചിരുന്നത്. സർക്കാർ സേവനത്തിലേക്ക് നിർബന്ധിതരായിട്ടും രണ്ടു സഹോദരന്മാരും കൃഷ്ണനെ മറന്നില്ല. പതിതാത്മാക്കളുടെ രക്ഷകനായ ഭഗവൻ ശ്രീ ചൈതന്യമഹാപ്രഭുവിന്റെ രൂപത്തിൽ തങ്ങളുടെ നാഥനെ കണ്ടുമുട്ടാൻ കഴിയുന്ന ദിവസത്തിനായി അവർ കൊതിച്ചു.
ഒടുവിൽ ഭഗവൻ ചൈതന്യ മഹാപ്രഭു ബംഗാളിലൂടെ ഒരു യാത്ര നടത്തി സഹോദരന്മാരെ നിയോഗിച്ച സ്ഥലത്തെത്തി. ഭഗവൻ ചൈതന്യ മഹാപ്രഭുവുമായി കൂടിക്കാഴ്ച നടത്തിയ ശേഷം ശ്രീല രൂപഗോസ്വാമിയും അനുപവും കുടുംബ ഉത്തരവാദിത്തങ്ങളിൽ നിന്ന് സ്വയം മോചിതരായി. അവർ ഭഗവൻ ചൈതന്യ മഹാപ്രഭുവിന്റെ യാത്രാ സംഘത്തിൽ വീണ്ടും ചേർന്നു. ശ്രീല സനാതനഗോസ്വാമിയെ സംബന്ധിച്ചിടത്തോളം ജീവിതം അത്ര ലളിതമായിരുന്നില്ല, കാരണം നവാബ് അദ്ദേഹത്തെ വളരെയധികം ആശ്രയിച്ചിരുന്നു.
ശ്രീല സനാതനഗോസ്വാമി അദ്ദേഹത്തിന്റെ വലംകൈയ്യനായിരുന്നു, പല ഉത്തരവാദിത്തങ്ങളും ഏറ്റെടുത്തു, പ്രത്യേകിച്ചും നവാബ് അയൽ സംസ്ഥാനങ്ങളെ കീഴടക്കാൻ പോയപ്പോൾ. സനാതനഗോസ്വാമിക്ക് സ്വന്തമായി കൊട്ടാരവും വലിയ സമ്പത്തും ഉണ്ടായിരുന്നിട്ടും, അതെല്ലാം ഉപേക്ഷിച്ച് ഭഗവൻ ശ്രീ ഭഗവൻ ചൈതന്യ മഹാപ്രഭു വിനോട് ഒപ്പം ജീവിക്കാൻ അദ്ദേഹം ആഗ്രഹിച്ചു. തുടക്കത്തിൽ, ശ്രീല സനാതനഗോസ്വാമി വളരെക്കാലമായി രോഗബാധിതനാണെന്ന് നടിച്ചു. നവാബിന് സംശയം തോന്നി, സനാതനഗോസ്വാമിയെ പരിശോധിക്കാൻ തന്റെ സ്വകാര്യ വൈദ്യനെ അയച്ചു.
ശ്രീല സനാതനഗോസ്വാമി ആരോഗ്യവാനാണെന്ന് വൈദ്യൻ അറിയിച്ചു. പ്രകോപിതനായ നവാബ് തന്റെ കാവൽക്കാരോടൊപ്പം സനാതനഗോസ്വാമിയുടെ കൊട്ടാരത്തിലേക്ക് അതിക്രമിച്ചു കയറി. അസുഖത്തിനുപകരം, പണ്ഡിതരും ബ്രാഹ്മണരും നിറഞ്ഞ ഒരു മുറിയിൽ ഭഗവതത്തെക്കുറിച്ച് ചർച്ച ചെയ്യുന്നതിൽ സനാതനഗോസ്വാമി ഏർപ്പെട്ടിരിക്കുന്നതായി അദ്ദേഹം കണ്ടു.
നവാബ് ആവശ്യപ്പെട്ടു, "നിങ്ങൾ സുഖമായിരിക്കുന്നതിനാൽ, ഉടനെ എന്നോടൊപ്പം ഒറീസയിലേക്ക് വരൂ, അവിടെ ഞാൻ മറ്റൊരു രാജ്യം കീഴടക്കും." ആദരവോടെ, ശ്രീല സനാതനഗോസ്വാമി മറുപടി പറഞ്ഞു, " ജഗന്നാഥ സ്വാമി ഒറീസയിലെ ഭഗവാനാണ്, നിങ്ങൾ അവിടെ പോകുന്നത് അദ്ദേഹത്തിന് വേദന നൽകും. നിങ്ങൾക്ക് ഇഷ്ടമുള്ളത് ചെയ്യാം, പക്ഷേ ഞാൻ പോകാൻ വിസമ്മതിക്കുന്നു. നവാബിന്റെ കണ്ണുകൾ രക്ത നിറമായി, നെഞ്ച് നെടുവീര്പ്പിട്ടു. "അവനെ ജയിലിൽ എറിയുക!" എന്ന് തന്റെ കാവൽക്കാരോട് ആജ്ഞാപിച്ച് കോപാകുലനായി മുറിയിൽ നിന്ന് ഇറങ്ങി പോയി.
പലായനം
ജയിലിൽ കഴിയുമ്പോൾ ശ്രീല രൂപഗോസ്വാമിയിൽ നിന്ന് ശ്രീല സനാതനഗോസ്വാമിക്ക് ഒരു രഹസ്യ സന്ദേശം ലഭിച്ചു. " ഭഗവൻ ചൈതന്യ മഹാപ്രഭു പുരിയിൽ നിന്ന് വൃന്ദാവനിലേക്കുള്ള ഒരു തീർത്ഥാടനത്തിനായി പോയിരിക്കുന്നു. ഞങ്ങൾക്ക് അറിയാവുന്ന വിശ്വസ്തനായ ഒരു വ്യാപാരിയുടെ പക്കൽ പതിനായിരം സ്വർണനാണയങ്ങൾ ഞാൻ ഏല്പിച്ചിട്ടുണ്ട്. രക്ഷപ്പെടാൻ ആ പണം ഉപയോഗിച്ച് വൃന്ദാവനത്തിലേക്ക് വരൂ" എന്നായിരുന്നു സന്ദേശം.
ജയിൽ സൂക്ഷിപ്പുകാരനുമായി ശ്രീല സനാതനഗോസ്വാമി വളരെ സൗഹൃദത്തിലായി. രക്ഷപ്പെടാനായി ഏഴായിരം സ്വർണനാണയങ്ങൾ അദ്ദേഹത്തിന് വാഗ്ദാനം ചെയ്തു. പക്ഷേ ജയിലർ ആശങ്കാകുലനായിരുന്നു. "എനിക്ക് സഹായിക്കാൻ ആഗ്രഹമുണ്ട്, പക്ഷേ ഞാൻ നവാബിനെ ഭയപ്പെടുന്നു" എന്ന് അദ്ദേഹം പറഞ്ഞു.
ശ്രീല സനാതനഗോസ്വാമി അദ്ദേഹത്തെ ഉപദേശിച്ചു, "സുഹൃത്തേ, ഭയപ്പെടേണ്ട. ഇങ്ങനെ പറയൂ- നിങ്ങൾ ഗംഗാ തീരത്തെ ശൗചാലയത്തിലേക്ക് എന്നെ കൊണ്ടുപോയി, അവിടെ എത്തിയപ്പോൾ ഞാൻ പെട്ടെന്ന് ആ നദിയിലേക്ക് ചാടി- ഒഴുക്കിൽ പെട്ട് കാണാതെ പോയി."
ജയിലർ സമ്മതിക്കുകയും പദ്ധതി നടപ്പാക്കുകയും ചെയ്തു. തന്റെ ദാസനായ ഇഷാനും എട്ട് സ്വർണനാണയങ്ങളും എടുത്ത് ബിഹാർ പ്രവിശ്യയിലെ പട്ടഡ എന്ന സ്ഥലത്ത് എത്തുന്നതുവരെ ഘോര വനങ്ങളിലൂടെ സനാതനഗോസ്വാമി രാവും പകലും വേഗത്തിൽ നടന്നു. അവിടെ അവർ ഒരു സത്രത്തിൽ കുറച്ചുസമയം വിശ്രമിച്ചു.
അതേസമയം, അവരുടെ കയ്യിൽ രഹസ്യമായി സൂക്ഷിച്ച എട്ടു സ്വർണ നാണയങ്ങൾ കൊള്ളയടിക്കാൻ സത്രമുടമ പദ്ധതിയിട്ടു. അയാളുടെ അമിത സൗഹൃദം കണ്ട്, സനാതനഗോസ്വാമി അപകടം തിരിച്ചറിഞ്ഞു. പ്രശ്നം പരിഹരിക്കാൻ സനാതനഗോസ്വാമി സത്രമുടമയ്ക്ക് ഏഴ് സ്വർണനാണയങ്ങളും ഒരെണ്ണം ഇഷാനും നൽകി. ഭഗവൻ കൃഷ്ണനെ മാത്രം ആശ്രയിച്ച് സനാതനഗോസ്വാമി ഒറ്റയ്ക്ക് യാത്ര തുടർന്നു.
യാത്രയ്ക്കിടെ, ഭഗവൻ ചൈതന്യ മഹാപ്രഭു വൃന്ദാവൻ പര്യടനം പൂർത്തിയാക്കി ബെനാറസിൽ താമസിക്കുകയാണെന്ന് ശ്രീല സനാതനഗോസ്വാമി കേട്ടു. സനാതനഗോസ്വാമി അവിടെ ഭഗവൻ ചൈതന്യ മഹാപ്രഭുവിനെ കണ്ടുമുട്ടി, ധാരാളം ഉപദേശങ്ങൾ സ്വീകരിച്ചു. പുണ്യസ്ഥലങ്ങൾ കണ്ടെത്തുന്നതിനും ക്ഷേത്രങ്ങൾ സ്ഥാപിക്കുന്നതിനും വൃന്ദാവനിലേക്ക് പോയി സഹോദരൻ ശ്രീല രൂപഗോസ്വാമി യെ സഹായിക്കാൻ ഭഗവൻ ചൈതന്യ മഹാപ്രഭു സനാതൻ ഗോസ്വാമിയോട് നിർദ്ദേശിച്ചു
സ്വപ്നം
ആയിരക്കണക്കിന് വർഷങ്ങൾക്ക് മുമ്പ്, കലിയുഗത്തിന്റെ തുടക്കത്തിൽ, വജ്ര എന്ന മഥുര രാജാവ് ഉണ്ടായിരുന്നു. അദ്ദേഹം ഒരു ശുദ്ധ ഭക്തൻ മാത്രമല്ല, ഭഗവൻ ശ്രീകൃഷ്ണന്റെ ചെറുമകനുമായിരുന്നു.
അക്കാലത്ത് മുസല്മാന് അധിനിവേശക്കാർ ഭാരതം പിടിച്ചടക്കി ക്ഷേത്ര വിഗ്രഹങ്ങളെ നശിപ്പിക്കാൻ ഉദ്ദേശിച്ചിരുന്നു. വജ്ര, മദൻ മോഹൻ ഉൾപ്പെടെ നിരവധി വിഗ്രഹങ്ങളെ എടുത്ത് സുരക്ഷിത സ്ഥലങ്ങളിൽ ഒളിപ്പിച്ചു. പുരാതനവും പ്രധാനപ്പെട്ടതുമായ വിഗ്രഹങ്ങളുടെ ആരാധന പുനഃസ്ഥാപിക്കുക എന്നതായിരുന്നു ഭഗവൻ ചൈതന്യ മഹാപ്രഭുവിന്റെ ഒരു ദൗത്യം.
മദൻ മോഹൻ വിഗ്രഹം ചൗബേ എന്ന ഒരു ബ്രാഹ്മണന്റെ വീട്ടിലായിരുന്നു. അദ്ദേഹം മദൻ മോഹനെ സ്വന്തം മക്കളിൽ ഒരാളെപ്പോലെയാണ് കണ്ടത്. ബ്രാഹ്മണന്റെ കുട്ടികൾ യഥാർത്ഥത്തിൽ മദൻ മോഹന്റെ ഒപ്പം കളിച്ചു.
ഒരു ദിവസം, ശ്രീല സനാതൻ ഗോസ്വാമി വീട് സന്ദർശിച്ചു, അവിടെ നടക്കുന്നത് കണ്ട് ഞെട്ടി. “നിങ്ങൾക്ക് ശരിയായ ആരാധന സമ്പ്രദായം ഉണ്ടായിരിക്കണം,” സനാതൻ ഗോസ്വാമി തറപ്പിച്ചുപറഞ്ഞു, വിഗ്രഹാരാധനയുടെ നിയമങ്ങളും ചട്ടങ്ങളും ചൗബിനെ നിർദ്ദേശിക്കാൻ തുടങ്ങി.
അന്ന് രാത്രി മദൻ മോഹൻ ചൗബിനോട് ഒരു സ്വപ്നത്തിൽ പ്രത്യക്ഷപ്പെട്ട് പറഞ്ഞു, "നിങ്ങൾക്ക് വളരെയധികം കുട്ടികളുണ്ട്, ശ്രീല സനാതൻ ഗോസ്വാമിക്ക് ആരുമില്ല. അതിനാൽ നിങ്ങൾ എന്നെ അദ്ദേഹത്തിന് നൽകണമെന്ന് ഞാൻ ആഗ്രഹിക്കുന്നു "
മദൻ മോഹൻ ശ്രീല സനാതൻ ഗോസ്വാമിന്റെ സ്വപ്നത്തിൽ പ്രത്യക്ഷപ്പെട്ട് തന്റെ പദ്ധതിയെക്കുറിച്ച് പറഞ്ഞു. "പക്ഷേ, എന്റെ ഭഗവാനെ, അങ്ങയെ പരിപാലിക്കാൻ ഞാൻ ആഗ്രഹിക്കുന്നുവെങ്കിലും, ഞാൻ ഭിക്ഷാടനത്തിലൂടെ ജീവിക്കുന്ന ഒരു ദരിദ്രനായ സന്യാസി മാത്രമാണ്. അങ്ങേക്ക് എങ്ങനെ ശരിയായി ഭക്ഷണം നൽകാനാകും?"
മദൻ മോഹൻ മറുപടി പറഞ്ഞു, "സനാതൻ, നിങ്ങളുടെ അവസ്ഥ എനിക്കറിയാം, പക്ഷേ വിഷമിക്കേണ്ട. വരണ്ട ചപ്പാത്തി മാത്രമാണെങ്കിലും നിങ്ങൾ നിവേദിക്കുന്നതെന്തും ഞാൻ സ്വീകരിക്കും."
അടുത്ത ദിവസം ശ്രീല സനാതൻ ഗോസ്വാമി ചൗബിനെ സന്ദർശിക്കുകയും പരസ്പരം അവരുടെ സ്വപ്നങ്ങൾ അറിയിക്കുകയും ചെയ്തു. അങ്ങനെ ഭഗവാന്റെ പരിപാലനം സനാതൻ ഗോസ്വാമിലേക്ക് മാറി, അദ്ദേഹം മദൻ മോഹനെ വൃന്ദാവനത്തിൽ താമസിച്ചിരുന്ന കുന്നിലേക്ക് കൊണ്ടുപോയി. തന്റെ പുൽ കുടിലിനടുത്തുള്ള ഒരു മരത്തിൽ ഭഗവാനെ സൂക്ഷിച്ചു.
സാധാരണ, ദിവസവും ശ്രീല സനാതൻ ഗോസ്വാമി കുറച്ച് ഗോതമ്പ് മാവ് യാചിക്കുകയും യമുനയിലെ വെള്ളം ചേർത്ത് കുഴച്ച് ഒരു ചപ്പാത്തി ഉണ്ടാക്കും. ചൂടുള്ള കൽക്കരിയിലേക്ക് ഇട്ട് അദ്ദേഹം അത് പാചകം ചെയ്ത്, മദൻ മോഹന് നിവേദിച്ചത്തിന് ശേഷം ആ ദിവസത്തെ പ്രസാദമായി സ്വീകരിക്കുകയും ചെയ്യും.
മദൻ മോഹൻ ഉപ്പ് ചോദിക്കുന്ന ദിവസം വരെ എല്ലാം ഇതുപോലെ തുടർന്നു. ശ്രീല സനാതൻ ഗോസ്വാമി പറഞ്ഞു, "ഇത് സംഭവിക്കുമെന്ന് എനിക്കറിയാമായിരുന്നു. ഇന്ന് അങ്ങേക്ക് ഉപ്പ് വേണം, നാളെ അങ്ങേക്ക് മധുരപലഹാരങ്ങൾ വേണം, അതിനുശേഷം അങ്ങേക്ക് താമസിക്കാൻ ഒരു വലിയ ക്ഷേത്രം ആവശ്യപ്പെടും. ദയവായി ഈ വൃദ്ധനോട് കരുണ കാണിക്കൂ, എന്റെ നാഥാ ഇവയ്ക്കുള്ള സജ്ജീകരണങ്ങൾ അങ്ങ് തന്നെ ഏര്പ്പാടാക്കണം. ഭഗവാൻ അതുതന്നെ ചെയ്തു.
ഉപ്പ് വ്യാപാരി
കൃഷ്ണദാസ് കപൂർ എന്ന ധനികനായ ഒരു ഉപ്പ് വ്യാപാരി ഉണ്ടായിരുന്നു. ഒരു ദിവസം വലിയ ഉപ്പ് വ്യാപാരം ചെയ്യുന്നതിനിടയിൽ, അദ്ദേഹത്തിന്റെ വഞ്ചി യമുനയുടെ ഒരു മണല്ത്തിട്ടയിൽ കുടുങ്ങി. എത്ര ശ്രമിച്ചിട്ടും വഞ്ചി തിരിക്കാൻ അദ്ദേഹത്തിന് കഴിഞ്ഞില്ല. തന്റെ ചരക്ക് വിലപ്പെട്ടതായതിനാൽ വഞ്ചി ചരിഞ്ഞു വീണാൽ എല്ലാം നശിക്കും എന്ന് ഓർത്ത് അദ്ദേഹം വിഷമിച്ചു. സഹായത്തിനായി അദ്ദേഹം തീവ്രമായി പ്രാർത്ഥിച്ചു.
ദൈവാധീനം കൊണ്ട്, ഒരു ഗോപ കുമാരൻ അയാളുടെ അടുത്തെത്തി, അടുത്തുള്ള കുന്നിൽ താമസിക്കുന്ന ശ്രീല സനാതൻ ഗോസ്വാമിയെ കാണാൻ വ്യാപാരിയോട് നിർദ്ദേശിച്ചു. വിഷമത്തിലായിരുന്ന ഉപ്പ് വ്യാപാരിയോട് ശ്രീല സനാതൻ ഗോസ്വാമിയോട് സഹായം ചോദിച്ചു. “മദൻ മോഹനോട് പ്രാർത്ഥിക്കുക,”സനാതൻ ഗോസ്വാമി ഉപദേശിച്ചു. " ഭഗവൻ നിങ്ങളുടെ പ്രാർത്ഥന കേൾക്കും."
കൃഷ്ണദാസ് സഹായത്തിനായി ഭഗവാനോട് പ്രാർത്ഥിച്ചു. മറുപടിയായി, പെട്ടെന്ന് കൊടുങ്കാറ്റും മഴയും വന്നു. നദിയിലെ വെള്ളം കൂടിയപ്പോൾ വഞ്ചി സ്വതന്തയായി. കൃഷ്ണദാസിന് ആശ്വാസവും സന്തോഷവുമായി. തന്റെ ചരക്ക് പരിശോധിക്കാൻ മടങ്ങിയെത്തിയ അദ്ദേഹം ഉപ്പിന് പകരം അത്ഭുതകരമായി വിലയേറിയ കർപ്പൂരവും തിളങ്ങുന്ന രത്നങ്ങളും കണ്ടെത്തി.
തന്മൂലം, വ്യാപാരിക്ക് വളരെയധികം ലാഭം കിട്ടി. മദൻ മോഹന്റെ സന്തോഷത്തിനായി മനോഹരമായ ഒരു ക്ഷേത്രം നിർമ്മിക്കാൻ ധനസഹായം നൽകാൻ അദ്ദേഹം തയ്യാറായി. ഈ രീതിയിൽ ശ്രീല സനാതൻ ഗോസ്വാമി അദ്ദേഹത്തിന്റെ സേവനത്തിൽ സഹായിച്ചു- ഭഗവാന് ആവശ്യമായ എല്ലാ ഉപ്പും ലഭിച്ചു!
കൃഷ്ണന്റെ കാൽപ്പാടുകൾ
നാൽപ്പത്തിമൂന്ന് വർഷം ശ്രീല സനാതൻ ഗോസ്വാമി വൃന്ദാവൻ ഗ്രാമങ്ങളിൽ സഞ്ചരിച്ച് കണ്ടുമുട്ടിയ എല്ലാവർക്കും ധര്മ്മോപദേശം നൽകി. ഭഗവൻ ചൈതന്യ മഹാപ്രഭു പലപ്പോഴും പറയാറുണ്ടായിരുന്നു, " സനാതൻ ഗോസ്വാമി എന്റെ പ്രിയപ്പെട്ട ഭക്തനാണ്
അറുപത്തഞ്ചാം വയസ്സിൽ, ശ്രീല സനാതൻ ഗോസ്വാമി ദിവസവും ഗോവർദ്ധൻ പർവ്വതത്തിനു ചുറ്റും നടന്നു, അക്കാലത്ത് ഇരുപത്തിനാലു മൈൽ ദൂരം ഉണ്ടായിരുന്നു. ഈ പരിക്രമ നടത്തുന്നതിനിടയിൽ, ഗോവർദ്ധൻ പർവ്വതത്തിനും വഴിയിൽ കണ്ടുമുട്ടുന്ന എല്ലാ വൈഷ്ണവർക്കും 1,008 പ്രണാമങ്ങൾ അർപ്പിക്കുന്ന പ്രതിജ്ഞ അദ്ദേഹം പാലിച്ചു.
വാർധക്യത്തിൽ ശ്രീല സനാതൻ ഗോസ്വാമി ഇത്തരം പ്രയാസകരമായ തപസ്യ ചെയ്യുന്നത് സഹിക്കാൻ ഭഗവാൻ കൃഷ്ണന് കഴിഞ്ഞില്ല. ഒരു ദിവസം ഭഗവാൻ കൃഷ്ണൻ സ്വയം സനാതൻ ഗോസ്വാമിയെ തടഞ്ഞുനിർത്തി പറഞ്ഞു, "ബാബ, അങ്ങേക്ക് എല്ലാ ദിവസവും ഗോവർദ്ധൻ പർവ്വതത്തിനു ചുറ്റും നടക്കാൻ വയ്യ. അങ്ങ് ഇപ്പോൾ ഈ വ്രതം ഉപേക്ഷിക്കണം." "ഇല്ല! എനിക്ക് ഈ പ്രതിജ്ഞ ഉപേക്ഷിക്കുന്നത് പരിഗണിക്കാൻ പോലും കഴിയില്ല” എന്ന് പറഞ് പരിക്രമ തുടർന്നു.
ഭക്തന്റെ നിശ്ചയധാർഢ്യത്തിൽ ഭഗവാൻ ശ്രീകൃഷ്ണൻ സംതൃപ്തനായി. സ്നേഹവും അനുകമ്പയും കൊണ്ട് ഭഗവാൻ വീണ്ടും ശ്രീല സനാതനഗോസ്വാമിയെതടഞ്ഞു. “നോക്കൂ,” തന്തിരുവടി കല്പിച്ചു. ഒരു വലിയ പരന്ന കല്ലിൽ (ഗോവർദ്ധൻ ശില) നിന്ന് ഭഗവാൻ കൃഷ്ണൻ തന്റെ പ്രസിദ്ധമായ പുല്ലാങ്കുഴൽ വായിച്ചു. ഭഗവാൻ ഇറങ്ങിയപ്പോൾ, കല്ല് പരമാനന്ദത്തിൽ ഉരുകിയതായി സനാതന് മനസ്സിലായി, കാരണം ഭഗവാന്റെ പാദകമലങ്ങൾ അതിന്റെ ഉപരിതലത്തിൽ വ്യക്തമായി പതിഞ്ഞിരുന്നു .
ഭഗവാൻ കല്ല് ശ്രീല സനാതനഗോസ്വാമിക്ക് കൈമാറി പറഞ്ഞു, "അങ്ങ് എല്ലാ ദിവസവും ഈ കല്ലിന് ചുറ്റും നടക്കുകയാണെങ്കിൽ അത് ഗോവർദ്ധൻ പർവ്വതത്തെ ചുറ്റുന്നതിനു തുല്യമായിരിക്കും. ഈ വിധത്തിൽ, അങ്ങ് പ്രതിജ്ഞ പാലിക്കും. ദയവായി അത് ചെയ്യുക." ശ്രീ കൃഷ്ണൻ തന്റെ മുൻപിൽ നിൽക്കുന്നത് കണ്ട് ശ്രീല സനാതനഗോസ്വാമിന്റെ മൃദുവായ ഹൃദയവും ഉരുകി, ഭഗവാന്റെ അഭ്യർത്ഥന അംഗീകരിച്ചു. ഇപ്പോഴും അതേ കല്ല് വൃന്ദാവനത്തിലെ രാധ ദാമോദർ ക്ഷേത്രത്തിൽ കാണാം .
1558-ൽ ശ്രീല സനാതനഗോസ്വാമി ആത്മീയ ലോകത്തേക്ക് മടങ്ങി. അദ്ദേഹത്തിന്റെ സമാധി (സമാധി മന്ദിരം) രാധാ മദൻ മോഹന്റെ യഥാർത്ഥ ക്ഷേത്രത്തിന് പിന്നിൽ കാണാം.
കൃഷ്ണ-ലീലയിൽ ശ്രീല സനാതനഗോസ്വാമി രതി അഥവാ ലബംഗ-മഞ്ജരിയാണ്.
ശ്രീല സനാതനഗോസ്വാമി വിജയിക്കട്ടെ!
ഹരേ കൃഷ്ണ!
No comments:
Post a Comment