ജീവിതത്തിന്റെ പരമപരിപൂർണതയെ പ്രാപ്തമാക്കുക, അഥവാ ഭഗവദ് ധാമത്തിലേക്ക്, ഭഗവദ്സന്നിധിയിലേക്ക് മടങ്ങിച്ചെല്ലുക എന്ന ഒരുവന്റെ പരമദൗത്യത്തെ അവഗണിച്ചുകൊണ്ട്, ആത്മഹത്യാപരമായനയം ആരും സ്വീകരിക്കരുത്.
🌼🌼🌼🌼🌼🌼🌼🌼🌼🌼🌼🌼
ഹസ്തിനപുരത്തിലെ പ്രഭാപൂർണമായ സിംഹാസനത്തിൽ പരീക്ഷിത്ത് മഹാരാജാവിനെ അവരോധിക്കുകയും, ശ്രീകൃഷ്ണ ഭഗവാന്റെ പൗത്രനായ വജ്രനെ, മഥുരയിലെ രാജാവായി അഭിഷിക്തനാക്കുകയും ചെയ്തശേഷം മഹാരാജാവ് യുധിഷ്ഠിരൻ പരിത്യാഗജീവിതക്രമം (സന്ന്യാസം) സ്വീകരിച്ചു. ഗുണത്തെയും, കർമത്തെയും അടിസ്ഥാനപ്പെടുത്തി 'വർണാശ്രമ-ധർമ'മെന്നറിയപ്പെടുന്ന നാല് വർണങ്ങളും, നാല് ആശ്രമങ്ങളും, ഉൾപ്പെടുന്ന വ്യവസ്ഥിതി, യഥാർത്ഥ മാനവജീവിതത്തിന്റെ ആരംഭദിശയാകുന്നു. മനുഷ്യന്റെ പ്രവൃത്തികളെ സംബന്ധിക്കുന്ന ഈ വ്യവസ്ഥിതിയുടെ സംരക്ഷകനെന്ന നിലയിൽ മഹാരാജാവ് യുധിഷ്ഠിരൻ കാലോചിതമായി രാജ്യഭരണം സർവഥാ യോഗ്യനും, സദ്ഗുണസമ്പന്നനും, പൂർണാഭ്യസ്തനുമായ പരീക്ഷിത്ത് മഹാരാജാവിന് കൈമാറുകയും, സജീവമായ ജീവിതത്തിൽനിന്നും വിരമിച്ച് സന്ന്യാസം സ്വീകരിക്കുകയും ചെയ്തു. വർണാശ്രമ-ധർമത്തെ സംബന്ധിച്ച ശാസ്ത്രീയമായ വ്യവസ്ഥിതി, മാനവജീവിതത്തിന്റെ ജീവനോപായത്തെ സംബന്ധിക്കുന്ന നാല് വർണ്ണമായും, ജീവിതവ്യവസ്ഥയെ സംബന്ധിക്കുന്ന നാല് ആശ്രമമായും വിഭജിക്കുന്നു. ജീവിതവ്യവസ്ഥയെ സംബന്ധിക്കുന്ന: ബ്രഹ്മചാരി, ഗൃഹസ്ഥം, വാനപ്രസ്ഥം, സംന്യാസം എന്നീ നാല് ആശ്രമങ്ങൾ ഏവരും - നാല് വർണ്ണങ്ങളിലുള്ളവരും സ്വീകരിക്കേണ്ടതാകുന്നു. എത്രതന്നെ വയസ്സായാലും ഇന്നത്തെ രാഷ്ട്രീയക്കാർ സജീവമായ രാഷ്ട്രീയ ജീവിതത്തിൽനിന്നും പിൻവാങ്ങാൻ അഥവാ വിരമിക്കാൻ ആഗ്രഹിക്കുന്നില്ല. എന്നാൽ മഹാരാജാവ് യുധിഷ്ഠിരൻ ഒരു ഉത്തമ രാജാവാകയാൽ സ്വമേധയാ രാജ്യഭരണകാര്യങ്ങളിൽനിന്നും വിരമിക്കുകയും, അടുത്ത ജന്മത്തിനായി, അഥവാ ജീവിതത്തിനായി സ്വയം തയ്യാറെടുക്കുകയും ചെയ്തു. ഏവരുടെയും ജീവിതം ജീവിതാന്ത്യത്തിൽ, അതായത് മരണപ്പെടുന്നതിന് പതിനഞ്ച്, ഇരുപത് വർഷങ്ങൾക്കു മുമ്പ്, ജീവിതത്തിന്റെ പരമപൂർണതയെ പ്രാപ്തമാക്കാനായി പൂർണമായും ഭഗവാന്റെ ഭക്തിയുതസേവനത്തിൽ വ്യാപൃതമാകാൻ കഴിയുന്നവിധം നിശ്ചയമായും ചിട്ടപ്പെടുത്തണം. ഒരുവൻ ജീവിതം മുഴുവൻ ഭൗതികാസ്വാദനത്തിലും, ഫാലോദ്ദിഷ്ട കർമങ്ങളിലും ഏർപ്പെടുന്നത് നിശ്ചയമായും വിഡ്ഢിത്തമാണ്. എന്തെന്നാൽ, മനസ്സ് ഭൗതികാസ്വാദനങ്ങൾക്കായി ഫലോദ്ദിഷ്ട കർമങ്ങളിൽ വ്യാപരിക്കുന്നിടത്തോളം, അഥവാ ആമഗ്നമായിരിക്കുന്നിടത്തോളം, ബദ്ധജീവിതത്തിൽനിന്നും, അഥവാ ഭൗതിക ബന്ധനത്തിൽനിന്നും സ്വതന്ത്രമാകാനുള്ള യാതൊരു സാധ്യതയുമില്ല. ജീവിതത്തിന്റെ പരമപരിപൂർണതയെ പ്രാപ്തമാക്കുക, അഥവാ ഭഗവദ് ധാമത്തിലേക്ക്, ഭഗവദ്സന്നിധിയിലേക്ക് മടങ്ങിച്ചെല്ലുക എന്ന ഒരുവന്റെ പരമദൗത്യത്തെ അവഗണിച്ചുകൊണ്ട്, ആത്മഹത്യാപരമായനയം ആരും സ്വീകരിക്കരുത്.
( ശ്രീമദ് ഭാഗവതം 1/15/39/ഭാവാർത്ഥം )
No comments:
Post a Comment