നരകത്തെയും സ്വർഗ്ഗമാക്കുന്ന “കൃഷ്ണ” നാമം

ദീർഘകാലത്തിനു മുൻപ് മുത്കലൻ എന്നൊരു രാജാവ് ജീവിച്ചിരുന്നു. അദ്ദേഹത്തിന്റെ ചരിത്രം വിഷ്ണുധർമ്മത്തിൽ വിസ്തരിച്ച് പ്രതിപാദിക്കപ്പെട്ടിരിക്കുന്നു. കൊടിയ പാപങ്ങൾ ചെയ്ത മഹാപാപിയായാണ് അദ്ദേഹം ജീവിച്ചിരുന്നത്. എങ്കിലും ഒരിക്കൽ, ‘തിലധേനു’ എന്നു വിശേഷിപ്പിക്കപ്പെടുന്ന കറുത്ത നിറമുള്ള ഒരു പശുവിനെ ദാനം ചെയ്യുമ്പോൾ, “കറുത്ത നിറമുള്ള ഈ പശുവിനെ ദാനം ചെയ്യുന്നു” എന്ന അർത്ഥത്തിൽ അദ്ദേഹം “കൃഷ്ണാർപ്പണം” എന്ന് ഉച്ചരിച്ചു. (‘കൃഷ്ണ’ എന്ന വാക്കിന് ‘കറുപ്പ്’ എന്നും ഒരു അർത്ഥമുണ്ട്).

കൃഷ്ണനാമം നൽകിയ പാപനിവാരണം

കാലക്രമത്തിൽ ആ രാജാവ് മരണമടഞ്ഞപ്പോൾ, അദ്ദേഹത്തിന്റെ പ്രാണനെ കവർന്ന് ശിക്ഷിക്കുവാൻ യമധൂതന്മാർ അദ്ദേഹത്തെ യമരാജന്റെ അടുക്കൽ എത്തിച്ചു. എന്നാൽ അവിടെ ഒരു അത്ഭുതം സംഭവിച്ചു; യമധൂതൻ തന്നെ അദ്ദേഹത്തെ എതിരേറ്റു വണങ്ങി ആദരിക്കാൻ തുടങ്ങി! കാര്യം മനസ്സിലാകാതെ വിസ്മയിച്ച മുത്കലൻ, യമനോട് ചോദിച്ചു: “നരകത്തിൽ ഉഴലേണ്ട എനിക്ക് ഇത്രയധികം ആദരവ് ലഭിക്കുന്നതിന്റെ കാരണം എന്താണ്?”

അതിന് യമൻ ഇപ്രകാരം മറുപടി നൽകി: “ഓ മുത്കല! എന്റെ ഭൃത്യന്മാർ ഇതിന്റെ കാരണം അറിയുന്നില്ല; നീയും അറിയുന്നില്ല. നിന്റെ ആയുഷ്കാലത്ത് ഒരിക്കൽ പശുവിനെ ദാനം ചെയ്യുമ്പോൾ നീ ‘കൃഷ്ണ’ എന്ന നാമം ഉച്ചരിച്ചു. ‘കറുത്ത നിറമുള്ള പശുവിനെ ദാനം നൽകുന്നു’ എന്ന അർത്ഥത്തിലാണ് നീ ‘കൃഷ്ണാർപ്പണം’ എന്ന് പറഞ്ഞത്. ഭഗവാന്റെ തിരുനാമമായ ‘കൃഷ്ണ’ എന്നതിന്റെ മഹിമ അറിയാതെയാണെങ്കിലും നീ അത് ഉച്ചരിച്ചത് നിമിത്തം, ആ നാമോച്ചാരണത്തിന്റെ ശക്തിയാൽ നിനക്ക് ഈ പുണ്യഭാഗ്യം സിദ്ധിച്ചിരിക്കുന്നു.”

നരകവാസികൾക്ക് ലഭിച്ച പുണ്യഭാഗ്യം

യമനും മുത്കലനും തമ്മിൽ നടന്ന ഈ സംഭാഷണം അവിടെയുണ്ടായിരുന്ന നരകവാസികളും കേൾക്കാനിടയായി. ‘കൃഷ്ണ’ എന്ന നാമോച്ചാരണം കേട്ട മാത്രയിൽത്തന്നെ അവരുടെ നരകദുഃഖങ്ങൾ മുഴുവൻ ശമിച്ചു. അവർ അനുഭവിച്ചിരുന്ന നരകം ആനന്ദദായകമായ സ്വർഗ്ഗമായി മാറി! മുത്കലൻ ഭഗവാനായ കൃഷ്ണനെ സ്മരിച്ചുകൊണ്ടല്ല ‘കൃഷ്ണ’ എന്ന് ഉച്ചരിച്ചത്; എങ്കിലും ആ നാമത്തിന്റെ ഫലം അദ്ദേഹത്തിന് ലഭിച്ചു. അതുപോലെതന്നെ, യമൻ തനിക്കുവേണ്ടിയോ മുത്കലനുവേണ്ടിയോ നരകവാസികളുടെ ഹിതം കരുതിയോ അല്ല ‘കൃഷ്ണ’ എന്ന നാമം ഉച്ചരിച്ചത്. എന്നാൽ, യാദൃശ്ചികമായി ‘കൃഷ്ണ’ എന്ന തിരുനാമം കേൾക്കാൻ ഇടയായ – അതിന്റെ മഹിമയൊന്നും അറിയാത്ത – ആ നരകവാസികളും തങ്ങളുടെ പാപങ്ങളിൽ നിന്ന് വിമുക്തരായി സ്വർഗ്ഗസുഖം പ്രാപിച്ചു.

അറിഞ്ഞും അറിയാതെയോ എങ്ങനെയെല്ലാം ഉച്ചരിച്ചാലും, സകല പാപങ്ങളെയും നശിപ്പിക്കുന്ന ഭഗവാൻ ശ്രീ കൃഷ്ണന്റെ നാമമഹിമ ഇതുതന്നെയാണ്!


🔆🔆🔆🔆🔆🔆🔆🔆🔆🔆🔆🔆🔆🔆🔆🔆
ഹരേ കൃഷ്ണ ഹരേ കൃഷ്ണ
കൃഷ്ണ കൃഷ്ണ ഹരേ ഹരേ
ഹരേ രാമ ഹരേ രാമ
രാമ രാമ ഹരേ ഹരേ
🔆🔆🔆🔆🔆🔆🔆🔆🔆🔆🔆🔆🔆🔆🔆🔆

ഹരേ കൃഷ്ണ 🙏
 
ആത്മീയ വിഷയങ്ങൾ വായിക്കുവാനും കേൾക്കുവാനുമായി താഴെ കാണുന്ന ലിങ്കുകൾ വഴി ഞങ്ങളോടൊപ്പം ചേരുക:
 
🌐 Website: https://suddhabhaktimalayalam.com
📲 Mobile App: https://play.google.com/store/apps/details?id=com.destine.suddhabhakti
 ✈️ Telegram: https://t.me/suddhabhaktimalayalam
💬 WhatsApp:https://chat.whatsapp.com/IElaVAiyfJsFQXEVZfbonR?mode=wwt
 ▶️ YouTube: https://www.youtube.com/@suddhabhakti
📘 Facebook:https://facebook.com/share/17aJNJJKiy
📷 Instagram:https://instagram.com/suddhabhaktimalayalam1