“മുനിമാരുടെ സംശയവും വ്യാസന്റെ ദിവ്യോപദേശവും”

ഒരിക്കൽ, ധർമ്മമാർഗ്ഗത്തിലെ ചെറിയൊരു സൽപ്രവൃത്തിപോലും മഹത്തായ ഫലങ്ങൾ നൽകുന്ന കാലം ഏതാണെന്നും, അത്തരം പുണ്യപ്രവൃത്തികൾ ആഹ്ലാദത്തോടുകൂടി അനുഷ്ഠിക്കാൻ ആർക്കാണ് കഴിയയുകയെന്നും അറിയാൻ ചില മുനിമാർ ആഗ്രഹിച്ചു. ഒരു തീരുമാനത്തിലെത്താൻ കഴിയാതെ വന്നപ്പോൾ അവർ വേദവ്യാസന്റെ ഉപദേശം തേടാൻ തീരുമാനിച്ചു. ആ സമയത്ത്, വേദവ്യാസൻ “ഗംഗാനദിയിൽ സ്നാനം ചെയ്യുകയായിരുന്നു. അദ്ദേഹത്തിനായി കാത്തിരുന്ന മുനിമാർ നദിക്കരയിലെ ഒരു വൃക്ഷച്ചുവട്ടിൽ ഇരുന്നു. ജലത്തിൽ നിന്നും സ്നാനം കഴിഞ്ഞ് ഉയർന്നുവന്ന വേദവ്യാസൻ, അടുത്ത മുങ്ങുന്നതിന് മുൻപായി “ശൂദ്രഃ സാധുഃ” (ശൂദ്രന്മാർ സാധുക്കളാണ്) എന്നും, “കലിഃ പ്രശംസനീയഃ” (കലിയുഗം പ്രശംസാർഹമാണ്) എന്നും ഉച്ചരിക്കുന്നത് അവർ കണ്ടു. വീണ്ടും ജലത്തിൽ മുങ്ങി നിവർന്ന അദ്ദേഹം “സ്ത്രീയഃ ശ്രേഷ്ഠാഃ” (സ്ത്രീകൾ ശ്രേഷ്ഠരാണ്) എന്ന് ഉച്ചരിച്ചുകൊണ്ട് മറ്റൊരു സ്നാനം കൂടി ചെയ്തു. നദീതീരത്തെ സ്നാനവേളകളിൽ സാധാരണയായി ജപിക്കേണ്ട മന്ത്രങ്ങളല്ലാത്തതിനാൽ, വേദവ്യാസന്റെ ഈ വചനങ്ങൾ മുനിമാരിൽ സംശയമുണ്ടാക്കി. വ്യാസന്റെ പ്രവൃത്തികൾ അവരിൽ അനിശ്ചിതത്വം സൃഷ്ടിക്കുകയും, അവർ കൗതുകത്തോടെ പരസ്പരം നോക്കുകയും ചെയ്തു.

കുറച്ചുനേരത്തിന് ശേഷം, സ്നാനവും നിത്യകർമ്മങ്ങളും പൂർത്തിയാക്കി വേദവ്യാസൻ ആശ്രമത്തിലേക്ക് എഴുന്നള്ളിയെത്തി. മുനിമാരും അവിടെയെത്തി പരസ്പരം അഭിവാദനങ്ങൾ അർപ്പിച്ചുകൊണ്ട് ഇരുന്നു. തുടർന്ന്, അവരുടെ വരവിന്റെ ഉദ്ദേശ്യത്തെക്കുറിച്ച് വേദവ്യാസൻ അന്വേഷിച്ചു. തങ്ങളുടെ ഒരു സംശയനിവൃത്തിക്കായാണ് തങ്ങൾ എത്തിയതെന്ന് മുനിമാർ അറിയിച്ചു. വേദവ്യാസൻ സ്നാനം ചെയ്യുന്ന വേളയിൽ “കലിയുഗം പ്രശംസാർഹമാണ്, ശൂദ്രന്മാർ സാധുക്കളാണ്, സ്ത്രീകൾ ശ്രേഷ്ഠരാണ്” എന്ന് ആവർത്തിച്ചുപറയുന്നത് തങ്ങൾ കേട്ടുവെന്നും, തങ്ങളുടെ യഥാർത്ഥ സംശയത്തിലേക്ക് കടക്കുന്നതിനു മുൻപ് ഇതിന്റെ പൊരുൾ പറഞ്ഞുതരണമെന്നും അവർ അഭ്യർത്ഥിച്ചു.

അവരുടെ വാക്കുകൾ ശ്രദ്ധാപൂർവ്വം കേട്ടതിനു ശേഷം വേദവ്യാസൻ ഇപ്രകാരം അരുളിച്ചെയ്തു: “ഞാൻ എന്തുകൊണ്ടാണ് ആ വചനങ്ങൾ ആവർത്തിച്ചു ജപിച്ചതെന്ന് നിങ്ങൾ കേൾക്കുക. സത്യയുഗത്തിൽ പത്തുകൊണ്ടു വർഷക്കാലം ജപവും തപസ്സും ബ്രഹ്മചര്യവും അനുഷ്ഠിക്കുമ്പോൾ ലഭിക്കുന്ന ഫലം, ത്രേതായുഗത്തിൽ ഒരു വർഷംകൊണ്ടും, ദ്വാപരയുഗത്തിൽ ഒരു മാസംകൊണ്ടും, കലിയുഗത്തിൽ വെറും ഒരു ദിവസംകൊണ്ടും ഒരു മനുഷ്യൻ പ്രാപിക്കുന്നു. സത്യയുഗത്തിലെ ധ്യാനംകൊണ്ടും, ത്രേതായുഗത്തിലെ യാഗങ്ങൾകൊണ്ടും, ദ്വാപരയുഗത്തിലെ ദേവപൂജകൾകൊണ്ടും ഏത് ഫലമാണോ ലഭിക്കുന്നത്, അതേ ഫലം കലിയുഗത്തിൽ ശ്രീഹരിയുടെ നാമജപംകൊണ്ടുമാത്രം ലഭിക്കുന്നു. കലിയുഗത്തിൽ വളരെ ചെറിയ പ്രയത്നത്താൽ മനുഷ്യർ പരമമായ ഗതി പ്രാപിക്കുന്നു. ഈ കാരണങ്ങളാൽ ഞാൻ കലിയുഗത്തെ ശ്രേഷ്ഠമെന്ന് വിശേഷിപ്പിച്ചു.”

ദ്വിജന്മാർ (ബ്രാഹ്മണ, ക്ഷത്രിയ, വൈശ്യ കുലജാതർ) ആദ്യം ബ്രഹ്മചര്യവ്രതം അനുഷ്ഠിച്ചുകൊണ്ട് വേദങ്ങൾ അഭ്യസിക്കേണ്ടതുണ്ടെന്ന് വേദവ്യാസൻ തുടർന്ന് വിശദീകരിച്ചു. അതിനുശേഷം ഗൃഹസ്ഥാശ്രമത്തിൽ പ്രവേശിക്കുമ്പോൾ, തങ്ങളുടെ കർമ്മങ്ങളിലൂടെ നേടിയ സമ്പത്തുകൊണ്ട് വിധിപ്രകാരം യാഗങ്ങളും ദാനങ്ങളും അനുഷ്ഠിക്കേണ്ടതുണ്ട്. വ്യർത്ഥമായ സംഭാഷണങ്ങളും, ആഹാരവും, യാഗങ്ങളും അവരുടെ പതനത്തിന് കാരണമായേക്കാം; അതിനാൽ അവർ എപ്പോഴും സംയമനം പാലിക്കേണ്ടതാണ്. തങ്ങളുടെ എല്ലാ കർമ്മങ്ങളിലും ധർമ്മത്തെ അവർ മനസ്സിൽ സൂക്ഷിക്കേണ്ടതുണ്ട്; കാരണം, ധർമ്മലംഘനം ദ്വിജന്മാരുടെ പതനത്തിന് ഇടയാക്കുന്നു. എന്നാൽ, ഒരു ശൂദ്രൻ ദ്വിജന്മാരെ ശുശ്രൂഷിച്ചുകൊണ്ട് മാത്രം ആ സകല ഗതികളും എളുപ്പത്തിൽ പ്രാപിക്കുന്നു.

ധർമ്മോചിതമായ മാർഗ്ഗങ്ങളിലൂടെ നേടിയ സമ്പത്തുകൊണ്ട് ദാനങ്ങൾ നൽകിയും യാഗങ്ങൾ അനുഷ്ഠിച്ചും കഠിനമായ വ്രതങ്ങൾ നോറ്റുമാണ് പുരുഷന്മാർ സ്വർഗ്ഗലോകം പ്രാപിക്കുന്നത്. എന്നാൽ സ്ത്രീകൾ തങ്ങളുടെ ശരീരവും മനസ്സും വാക്കുംകൊണ്ട് ഭർത്താക്കന്മാരെ ശുശ്രൂഷിച്ചുകൊണ്ട് ശുഭകരമായ ലോകങ്ങളെ പ്രാപിക്കുന്നു. മറ്റുള്ളവർ വലിയ പരിശ്രമത്തിലൂടെ നേടുന്ന ഫലങ്ങൾ സ്ത്രീകൾ യാതൊരു പ്രയത്നവുമില്ലാതെ കൈവരിക്കുന്നു; അതുകൊണ്ടാണ് വേദവ്യാസൻ അവരെ ശ്രേഷ്ഠരെന്ന് വിളിച്ചത്.

മുനിമാരെ ആശ്വസിപ്പിച്ചതിനു ശേഷം, അവരുടെ വരവിന്റെ യഥാർത്ഥ ഉദ്ദേശ്യം വെളിപ്പെടുത്താൻ വേദവ്യാസൻ അവരോട് ആവശ്യപ്പെട്ടു. തങ്ങളുടെ ആശങ്കകളും ചോദ്യങ്ങളും വേദവ്യാസൻ മുൻകൂട്ടി തന്നെ പരിഹരിച്ചുവെന്നും ഇനി സംശയങ്ങളൊന്നും ബാക്കിയില്ലെന്നും മുനിമാർ വിനയപൂർവ്വം അംഗീകരിച്ചു. അത്ഭുതവും കൃതജ്ഞതയും പ്രകടിപ്പിച്ചുകൊണ്ട് തങ്ങൾ സംതൃപ്തരായിരിക്കുന്നു എന്ന് അവർ അറിയിച്ചു. സൽഗുണങ്ങളാലും സദാചാരങ്ങളാലും തങ്ങളെത്തന്നെ ശുദ്ധീകരിച്ചിട്ടുള്ളവർക്ക് കലിയുഗത്തിൽ ഏറ്റവും കുറഞ്ഞ പ്രയത്നത്താൽ ആത്മീയ സിദ്ധി എളുപ്പത്തിൽ പ്രാപിക്കാമെന്ന് വേദവ്യാസൻ തുടർന്ന് വിശദീകരിച്ചു. ഈ യുഗത്തിലെ ഭഗവാൻ ശ്രീകൃഷ്ണന്റെ നാമജപമാത്രത്താൽ ഒരാൾക്ക് പരമപദം പ്രാപിക്കാൻ കഴിയുമെന്നത് കലിയുഗത്തിന്റെ ഏറ്റവും വലിയ പ്രത്യേകതയാണ്. വേദവ്യാസന്റെ വചനങ്ങളിൽനിന്ന് തങ്ങളുടെ സംശയങ്ങൾക്ക് കൃത്യമായ മറുപടി ലഭിച്ച മുനിമാർ, അദ്ദേഹത്തെ വണങ്ങി, അദ്ദേഹത്തിന്റെ നിർദ്ദേശപ്രകാരമുള്ള തീരുമാനങ്ങളോടെ തങ്ങളുടെ ഗൃഹങ്ങളിലേക്ക് മടങ്ങിപ്പോയി.

കഥയുടെ സന്ദേശം

ഗുണങ്ങളുടെയും കർമ്മങ്ങളുടെയും അടിസ്ഥാനത്തിൽ ശൂദ്രൻ ഏറ്റവും താഴ്ന്ന വർണ്ണമായി വർണ്ണാശ്രമ വ്യവസ്ഥയിൽ വേദഗ്രന്ഥങ്ങൾ വിവരിക്കുന്നു. അതുപോലെ, ഗുണങ്ങളുടെയും പ്രവർത്തനങ്ങളുടെയും അടിസ്ഥാനത്തിൽ സ്ത്രീകൾ പുരുഷന്മാരേക്കാൾ താഴെയായി കണക്കാക്കപ്പെടുന്നു. അവസാനമായി, മറ്റു യുഗങ്ങളെ അപേക്ഷിച്ച് ഗുണങ്ങളുടെയും കർമ്മങ്ങളുടെയും അടിസ്ഥാനത്തിൽ കലിയുഗം ഏറ്റവും അധഃപതിച്ചതായി കരുതപ്പെടുന്നു.

ഈ മൂന്ന് അവസ്ഥകളിലും പ്രകടമാകുന്ന പ്രധാന ഗുണം തമോഗുണമാണ്. അതിന്റെ സ്വാധീനത്താൽ ഒരു വ്യക്തിയുടെ ഗ്രഹണശേഷി മങ്ങുന്നു; അതിജീവനത്തിനും പ്രജനനത്തിനുമപ്പുറം ജീവിതത്തിന് അർത്ഥവും ലക്ഷ്യവുമില്ലെന്ന് അവൻ കരുതുന്നു. മറ്റുള്ളവരെ ചേർത്തുപിടിക്കുന്നതിനു പകരം സങ്കുചിതത്വവും പ്രത്യേകവാദവും സ്ഥാനം പിടിക്കുന്നു. പരോപകാരശീലം സ്വാർത്ഥതയ്ക്ക് വഴിമാറുന്നു. ശരീരത്തോടുള്ള ആത്മബന്ധം അതിരുകടന്ന് വളരുകയും, ശരീരത്തിനപ്പുറമുള്ള യാതൊരുവിധ യാഥാർത്ഥ്യത്തെയും അംഗീകരിക്കാൻ കഴിയാത്ത അവസ്ഥ സംജാതമാവുകയും ചെയ്യുന്നു. ലോകത്തിന്റെ പ്രതികൂല സാഹചര്യങ്ങൾക്ക് മുന്നിൽ തങ്ങൾ നിസ്സഹായരാണെന്ന് തോന്നുമ്പോൾ ഇച്ഛാശക്തി വളരെയധികം മങ്ങിപ്പോകുന്നു. സുഖഭോഗങ്ങളിലേക്കുള്ള പ്രവണത വർദ്ധിക്കുന്നതുകാരണം ആത്മസംയമനത്തിനുള്ള ശേഷി ക്ഷയിക്കുന്നു. ഫലേച്ഛയില്ലാത്ത അവസ്ഥ മാറി ഫലത്തോടുള്ള കടുത്ത ആസക്തി രൂപപ്പെടുന്നു; ഇത് ലൗകിക സുഖങ്ങളുടെയും ഐശ്വര്യങ്ങളുടെയും പിറകെ പോകുമ്പോൾ മനുഷ്യനെ അധാർമ്മിക പ്രവൃത്തികളിലേക്ക് നയിക്കുന്നു.

കലിയുഗത്തിൽ സ്ത്രീകളും പുരുഷന്മാരും ഒരുപോലെ തമോഗുണത്തിന്റെ ഇരകളായിത്തീരുന്നു; അതിനാൽ അവർ തമ്മിലുള്ള അന്തരം പ്രായോഗികമായി അപ്രത്യക്ഷമാകുന്നു. ഈ കാലഘട്ടത്തിൽ എല്ലാവരിലും ഏറ്റവും സാധാരണവും പ്രകടവുമായ ഭാവം തമോഗുണമാണ്; അതിനാൽ ബ്രാഹ്മണൻ, ക്ഷത്രിയൻ, വൈശ്യൻ, ശൂദ്രൻ എന്നീ വർണ്ണവ്യത്യാസങ്ങളും പ്രായോഗികമായി ഇല്ലാതാകുന്നു. യഥാർത്ഥമായ ഉന്നത വ്യത്യാസങ്ങളുടെ അഭാവംമൂലവും, മഹാത്മാക്കളുടെ സാന്നിധ്യം ഇല്ലാതാകുന്നതുകൊണ്ടും, എല്ലാ ലിംഗക്കാരും വർഗ്ഗക്കാരും സ്വാഭാവികമായും ഏറ്റവും താഴ്ന്ന നിലയിലേക്ക് പതിക്കുന്നു. തങ്ങൾക്ക് ചുറ്റും മഹത്വമുള്ള ആരെയും കണ്ടെത്താൻ കഴിയാത്തതുകൊണ്ട്, മഹത്വം കൈവരിക്കാനാവില്ലെന്ന് അവർ ദൃഢമായി വിശ്വസിക്കുന്നു. അധാർമ്മികതയും ഭോഗാസക്തിയും അസംതൃപ്തിയുമാണ് നിലനിൽപ്പിന്റെ സ്വാഭാവിക അവസ്ഥയെന്ന് അവർ വിശ്വസിക്കുന്നു. ചുറ്റുമുള്ളവരെല്ലാം തങ്ങളുടെ അതേ അധഃപതിച്ച സ്വഭാവക്കാരായതുകൊണ്ട്, എല്ലാ ലിംഗ-വർണ്ണ വ്യത്യാസങ്ങളും അടിച്ചമർത്തലുകളായും വിവേചനങ്ങളായും അവർക്ക് അനുഭവപ്പെടുന്നു.

തമോഗുണം അത്യധികമായി വർദ്ധിക്കുമ്പോൾ മനുഷ്യൻ അഹങ്കാരിയും ആർത്തിയുള്ളവനുമായിത്തീരുന്നു. ഉൽപ്പാദനം കുറയുകയും ആവശ്യം വർദ്ധിക്കുകയും ചെയ്യുന്നു. അത്തരം അവസ്ഥയിൽ, തങ്ങളുടെ ആവശ്യങ്ങൾ ചുരുക്കാനും ഉൽപ്പാദനം വർദ്ധിപ്പിക്കാനും കഴിയുന്നവർ പ്രകീർത്തിക്കപ്പെടുന്നു. അഹങ്കാരികളായ യജമാനന്മാരാകാതെ വിനീതരായ ദാസന്മാരായി വർത്തിക്കാൻ കഴിയുന്നവർ വാഴ്ത്തപ്പെടുന്നു. അങ്ങനെ, ഭർത്താക്കന്മാരെ ശുശ്രൂഷിക്കുന്ന സ്ത്രീകൾ പ്രശംസിക്കപ്പെടുന്നു. മറ്റു വർണ്ണങ്ങളെ സേവിക്കുന്ന ശൂദ്രന്മാർ വാഴ്ത്തപ്പെടുന്നു. ഗുരുക്കന്മാരെ സേവിക്കുന്ന ശിഷ്യന്മാർ ആദരിക്കപ്പെടുന്നു. അല്പം പ്രയത്നംകൊണ്ട് വളരെധികം നേടാൻ കഴിയുന്ന കലിയുഗം പ്രകീർത്തിക്കപ്പെടുന്നു. ചുരുക്കത്തിൽ, വിനയവും സേവനമനോഭാവവുമാണ് ഈ യുഗത്തിലെ തപസ്സും, യജ്ഞവും, യാഗവും, ത്യാഗവും, വിശാലമനസ്കതയും, പരോപകാരവും, വിരക്തിയും, ഇച്ഛാശക്തിയും. ഇവയെല്ലാം ശ്രീഹരിയുടെ നാമജപത്തോടൊപ്പം ചേരുമ്പോൾ ഒരു സാധകൻ അതിവേഗം അത്ഭുതകരമായ ആത്മീയ ഉന്നതി പ്രാപിക്കുന്നു.

വേദവ്യാസന്മാരായ മഹാത്മാക്കൾ വെള്ളത്തിൽ നിന്ന് പാൽ വേർതിരിച്ചെടുക്കുന്ന അരയന്നങ്ങളെപ്പോലെയാണ് (പരമഹംസർ). കറുത്ത മേഘത്തിലും അവർ വെള്ളിവെളിച്ചം ദർശിക്കുന്നു; തിന്മകളിലെ നന്മകൾ കണ്ടെത്തി, ഈ കാലഘട്ടത്തിന്റെ പ്രതികൂല ഗുണങ്ങളെയും പ്രവൃത്തികളെയും ഓർത്ത് തളർന്നുപോകാതെ, ഉദ്ധാരണത്തിന്റെ പാത സ്വീകരിക്കാൻ അവർ ജനങ്ങൾക്ക് പ്രചോദനം നൽകുന്നു. അതിനാൽ ഈ കഥ ഒരു അരയന്നത്തിന്റെ മനോഭാവം സ്വീകരിക്കാൻ നമ്മെ പ്രചോദിപ്പിക്കുന്നു—അതായത്, നന്മകളെ സ്വീകരിക്കുകയും തിന്മകളെ ഉപേക്ഷിക്കുകയും ചെയ്യുക.

അവലംബം: വിഷ്ണുപുരാണം



🔆🔆🔆🔆🔆🔆🔆🔆🔆🔆🔆🔆🔆🔆🔆🔆
ഹരേ കൃഷ്ണ ഹരേ കൃഷ്ണ
കൃഷ്ണ കൃഷ്ണ ഹരേ ഹരേ
ഹരേ രാമ ഹരേ രാമ
രാമ രാമ ഹരേ ഹരേ
🔆🔆🔆🔆🔆🔆🔆🔆🔆🔆🔆🔆🔆🔆🔆🔆

ഹരേ കൃഷ്ണ 🙏
 
ആത്മീയ വിഷയങ്ങൾ വായിക്കുവാനും കേൾക്കുവാനുമായി താഴെ കാണുന്ന ലിങ്കുകൾ വഴി ഞങ്ങളോടൊപ്പം ചേരുക:
 
🌐 Website: https://suddhabhaktimalayalam.com
📲 Mobile App: https://play.google.com/store/apps/details?id=com.destine.suddhabhakti
 ✈️ Telegram: https://t.me/suddhabhaktimalayalam
💬 WhatsApp:https://chat.whatsapp.com/IElaVAiyfJsFQXEVZfbonR?mode=wwt
 ▶️ YouTube: https://www.youtube.com/@suddhabhakti
📘 Facebook:https://facebook.com/share/17aJNJJKiy
📷 Instagram:https://instagram.com/suddhabhaktimalayalam1