മഹാശിവരാത്രി

ഒരിയ്ക്കൽ ഭഗവാൻ ശിവന്റെ പരമഭക്തനായ ഒരു പാവപ്പെട്ട വേടൻ വിറക് ശേഖരിക്കാനായി വനത്തിൽ പോയി. കാടിന്റെ വന്യതയിൽ വഴിതെറ്റിയ അദ്ദേഹത്തിന് നേരം ഇരുട്ടും മുൻപ് വീട്ടിലെത്താൻ സാധിച്ചില്ല. ഇരുട്ട് പടർന്നതോടെ കാട്ടുമൃഗങ്ങളുടെ ഗർജ്ജനം കേട്ട് ഭയചകിതനായ അദ്ദേഹം രക്ഷയ്ക്കായി അടുത്തുള്ള ഒരു മരത്തിൽ കയറി ഇരുന്നു. ഉറങ്ങിപ്പോയാൽ താഴെ വീണ് മൃഗങ്ങൾക്ക് ഇരയാകുമെന്ന് ഭയന്ന വേടൻ, ഉറക്കം വരാതിരിക്കാൻ മരത്തിലെ ഇലകൾ ഓരോന്നായി പറിച്ച് താഴെയിടാൻ തീരുമാനിച്ചു. ഓരോ ഇല പറിക്കുമ്പോഴും അദ്ദേഹം ഭക്തിയോടെ ശിവനാമം ജപിച്ചുകൊണ്ടിരുന്നു.

അദ്ദേഹം കയറിയിരുന്നത് ഭഗവാൻ ശിവന് ഏറ്റവും പ്രിയപ്പെട്ട കൂവള വൃക്ഷത്തിലായിരുന്നു.. ആ മരച്ചുവട്ടിലാകട്ടെ ഒരു ശിവലിംഗവും ഉണ്ടായിരുന്നു. താൻ പോലുമറിയാതെ ആ വേടൻ രാത്രി മുഴുവൻ കൂവളത്തിലകൾ അർപ്പിച്ച് ഭഗവാനെ പൂജിക്കുകയായിരുന്നു. തന്റെ ഭക്തന്റെ നിഷ്കളങ്കമായ പ്രവൃത്തിയിൽ പ്രസാദിച്ച ഭഗവാൻ ശിവൻ അദ്ദേഹത്തിന് ദർശനം നൽകി അനുഗ്രഹിച്ചു.

മറ്റൊരു പ്രധാനപ്പെട്ട കഥ ശ്രീമദ് ഭാഗവതത്തിൽ പ്രതിപാദിക്കുന്നുണ്ട്:

പണ്ട് ദേവാസുരന്മാർ അമൃതിനായി പാൽക്കടൽ മഥനം ചെയ്യാൻ തീരുമാനിച്ചു. ഭഗവാൻ വിഷ്ണുവിന്റെ നിർദ്ദേശപ്രകാരം വാസുകി എന്ന സർപ്പത്തെ കയറായും മന്ദരപർവ്വതത്തെ മത്തായും ഉപയോഗിച്ചാണ് മഥനം ആരംഭിച്ചത്. പർവ്വതം കടലിൽ താഴ്ന്നുപോയപ്പോൾ ഭഗവാൻ വിഷ്ണു കൂർമ്മരൂപം ധരിച്ച് പർവ്വതത്തെ തന്റെ പുറത്ത് താങ്ങിനിർത്തി. കടൽ കടഞ്ഞപ്പോൾ അത്യന്തം അത്ഭുതകരമായ പല വസ്തുക്കളും ഉയർന്നു വന്നു. എന്നാൽ പെട്ടെന്ന് ലോകത്തെ മുഴുവൻ നശിപ്പിക്കാൻ ശേഷിയുള്ള ‘ഹാലാഹലം’ എന്ന മാരകവിഷം പുറത്തുവന്നു.